馬達與連格特

守拙 於 23/09/2018 發表 收藏文章

曼聯英超又……咁無輸嘅,又失分啫。啱啱曼聯主場面對住升班馬狼隊,就算曼聯有費格遜再次健康地喺奥脱福睇波、費特攻入佢曼聯生涯嘅第一球,最終都要俾「葡人兵團」嘅狼隊追和,痛失兩分。開季曼聯先後輸俾白禮頓同熱刺,而家仲要和埋升班馬狼隊,相信領隊摩連奴都好大壓力下㗎喇。

只不過今場面對住狼隊,下半場尾個三十分鐘已經失去耐性,完全放棄地面組織,盲目地空中轟炸,唔少曼聯球迷或者都會覺得咁踢法究竟同之前莫耶斯領軍嗰陣究竟有乜野分別。另外今場要噤制搶分嘅時候,摩連奴再一次塞連格特入中路,而馬達就俾摩連奴放逐到邊路嘅位置。之不過,摩連奴咁樣擺位其實就未幫到球員發揮哂佢地嘅潛能囉。

馬達係一個典型嘅10號仔球員,佢喺禁區頂停波同傳送能力都係世界級嘅,如果俾佢打番攻中嘅位其實絕對可以幫助到曼聯嘅進攻。相反而家成日放佢喺右翼位,佢就無得發揮佢最擅長嘅功能。你可能話佢係左腳,放佢打右翼或者想佢內切入幫球隊組織同入波。何況現實裡面,馬達根本速度偏慢,根本唔夠支配力做呢樣野。佢打右面唔會同你拉到邊、落到底,只會喺右手面博下腳,完全浪費哂佢本身應有能力之餘,更加要辛苦埋年紀老邁嘅華倫西亞經常後上幫手進攻,搞到華倫西亞嘅回氣時間更長。用馬達打右手面,又幫唔到球隊,仲要令成個陣

至於連格特係一個好勤力嘅球員,好肯跑上跑落,遠射能力都有番咁上下。或者摩連奴貪佢有遠射能力就塞佢喺中路,咁就顯示咗摩連奴完全急功近利,無興趣等啲攻勢慢慢組織。連格特視野、禁區頂停波能力、連結攻勢能力都比較差,放連格特喺中間就會搞到進攻節奏同流暢性受阻。山齊士亦會因為連格特啲比波成日無厘頭而無所適從,導致表現無咁好。將連格特放番去右手面,長期用速度拉邊幫助球隊左右嘅攻擊更加平衡先係對球隊最有益嘅造法。

如果馬達可以打番正中間做禁區頂停波、連結攻擊,配上連格特長期拉右手面,左路有山齊士或者馬斯亞拉邊之餘又造下內切入,相信曼聯嘅攻勢可以更加立體、更有威脅,可以用地面組織KO對手,而唔洗攻極唔入之下,係咁斬比費蘭尼同盧卡古去博亂爭取入波。


如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • tinchi3721
    tinchi3721 於 24/09/2018 評論 NO. 1

    到而家都唔明買山齊士番黎做咩😫

  • ryankwok
    ryankwok 於 24/09/2018 評論 NO. 2

    byebye,摩佬

  • @michael@
    @michael@ 於 24/09/2018 評論 NO. 3

    置中根本浪費了連加特勤力上落的特性,以佢特性打邊佢一樣會助攻助守

快捷鍵:←
快捷鍵:→