辛祖可否成關鍵先生?

守拙 於 12/03/2019 發表 收藏文章
和富大埔近況唔錯,喺港超聯先後隊冧兩大班霸傑志同東方,作客亦輕鬆搞掂理文,而亞協外首回合亦0:0迫和黎明。今個禮拜三將會進行亞協外嘅次回合,返回「主場」旺角大球場再次惡鬥黎明。

今場和富大埔係必須贏波先可以晉級,由於首回合比數係0:0,有比數嘅和波都會因為作客入球唔夠而出局。係咁嘅前提下,和富大埔雖然照道理要比較進取去進攻,但係防守亦要小心應對,絕對唔可以大意失作客入球。

前場爭取入球任務嘅重任,會落係港腳辛祖同長人中鋒哈利腳下。一月回港投奔大埔嘅辛祖,已經迅速融入球隊,幫球隊喺本地賽入咗三球。雖然佢一直喺本地賽有唔錯表現,但係面對外隊嗰陣好多時都有關鍵時候「腳軟」。大家一定仲記得辛祖代表港隊打亞盃外作客馬來西亞九十分鐘嘅十二碼宴客,又一定記得代表傑志喺亞冠外對蔚山單刀機會射失,上場對黎明根據報導,亦有球射中柱錯過射入作客入球嘅良機……

唔知今次辛祖返到主場,代表香港代表嘅大埔面對外隊,再有關鍵時刻嘅時候,可唔可以頂得住壓力,唔好腳軟,話俾大家知自己頂得住壓力?佢又會唔會入到佢亞洲賽嘅第一球?幫唔幫助到球隊贏波晉級?大家星期三一齊入場見證住呢啲問題嘅答案揭曉啦!

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→