賽後短評:夢想欠運、南區進攻有待改善

守拙 於 14/09/2018 發表 收藏文章

今晚上演咗一場港超獨腳戲,由上場主場慘敗俾香港飛馬嘅夢想FC,繼續主場出擊面對住實力唔錯嘅冠忠南區。最終夢想FC全場主導形勢之下,0:2不敵保守至極嘅冠忠南區,以下係我嘅少少嘅睇法。

1.夢想新防中馬高斯對版

上季冠忠南區正選主力前鋒係馬高斯,上季未約滿之後拒絕續約離隊。只係走咗一個馬高斯,又黎番一個馬高斯!今次呢個馬高斯效力夢想FC,位置係6號位嘅防中位置。以今場表現黎講呢位馬高斯幾對版,補位、傳波都幾準確,比起上年表現患得患失嘅外籍防中加倫表現更加好!

2. 林樂勤嘅位置

今場林樂勤擔任左翼衛,需要負擔攻守嘅工作,唔可以專注進攻嘅工作。林樂勤係好有進攻才華嘅年輕進攻球員,傳控射乜都掂,值得放喺前面淨係專注進攻,要佢防埋守有啲浪費。我認為如果將林樂勤放喺朱偉均嘅輔鋒位置將會再加強夢想嘅進攻火力,左翼衛可以用其他球員取代。

3. 南區過份保守

面對實力較弱嘅夢想FC,南區似乎太過保守喇。今場南區長期縮喺自己後半場任人魚肉,睇到球迷都有啲不滿。進攻板斧亦唔見有,最後有啲幸運成份同門將謝德謙幾次神救先可以最後贏波。


4.南區終於搵啱翼鋒

南區教練鄭兆聰一直希望揾一個具質素嘅翼鋒幫輕一下蘇沙,只係無論加洛斯、伊利亞斯都唔係太融合到球隊。今次簽到迪亞高似乎解決到呢個問題,第一場已經表現出色並且射入精彩嘅埋齋波。


如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→