皇朝結束?傑志不再屈機!

守拙 於 22/11/2018 發表 收藏文章
近兩三季睇港超都會覺得傑志喺港超係屈哂機,其他球隊對住佢地完全無得打咁濟,拎到一分都係好難得。黎到今季情況失常,先對東方、元朗、大埔都俾對手摸和到,之後面對魚腩份子嘅凱景竟然半場可以一球都入唔到!今場就更加慘,雖然有盧卡斯入波,俾對面中堅梁諾恆梅開二度,加上伊達憑罰球建功,最終傑志慘敗1:3!上季16勝2和嘅超級班霸,家下竟然排第五,呢陣子嘅傑志可以以霸氣盡失黎形容!

*後防球員太矮


今季長期用兩個矮仔李毅凱同金奉珍打正選,導致俾人狂用高空轟炸屈機!喺列斯奧同艾里奧年老多傷下,傑志有必要引入多一個有一定實力又高大嘅本地中堅改善情況。

*重用歸化兵嘅代價

過去傑志都好依靠林柱機、林恩許、林志堅呢啲球員,而無去俾啲機會土炮兵,結果土炮兵走得就走。今年林志堅過檔富力,林柱機、林恩許就突然回哂塘,打唔出水準,咁連累球隊表現差都可以理解。
*板凳深度大減


上季傑志入唔到波個陣,通常就會即刻㩒制換進攻球員入黎。上季有辛祖、艾力士、科蘭、褔保羅、盧卡斯、費蘭度……咁多進攻球員,數都數唔哂,結果今年走哂啲本地進攻球員,換來泰迪同羅拔兩個外援進攻球員。問題係上年換辛祖、艾力士嗰啲入黎唔洗哂外援名額,今年要,成件事已經唔同。上年換進攻球員唔洗一定收起中堅亞援金奉珍,今年就一定要。

*正選陣容欠創造力

有鞠盈智同羅拔呢啲創造型球員,偏偏場場坐後備。正選無乜創造力之下,基本上淨係斬比盧卡斯,完全無乜套路可言。

*把握力差


前鋒線靠哂盧卡斯,偏偏佢把握力差到爆,十次機會先會入到次咁,白白浪費多次入波機會。

*陣容老化

丹尼、唐建文、黃洋、佐迪呢啲都已經好老,但係都仲係要重用呢啲老人家。仲要丹尼場場踢足九十分鐘,佐迪出黎仲竟然要拉右邊而唔係留喺中間……咁可以叫虐老添,呢啲老人家都chur盡哂㗎喇,係時候俾下一代接班。

傑志問題多的是,解決需要時間。不過傑志球迷洗唔洗一遇到低谷就衝出黎話朱sir out,it's time to change 咁激?話哂人哋幫你攞咗兩屆港超,又拎過亞冠歷史性嘅三分!俾啲時間朱sir重建球隊喇!

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→