球迷高呼蘇斯克查要坐正?有香港版!

守拙 於 16/01/2019 發表 收藏文章

最近曼聯六連勝,唔少球迷叫曼聯高層放棄聘請名帥,直接俾球隊名宿兼現時球隊暫代主教練蘇斯克查坐正。同樣情況都有喺啱啱截止主教練申請嘅香港隊上面出現喎!臨危受命嘅郭嘉諾最近喺省港盃帶領一眾香港小將爆大冷大炒廣東隊捧起省港盃,現場慶祝捧盃嗰陣,球迷都紛紛大嗌坐正。我亦都認為足總都無必要浪費錢去請一個高薪嘅外藉教練,不如順應民意俾個機會郭嘉諾喇!

首先郭嘉諾已經證明自己有能力靈活運用戰術,幫球隊爭取佳績。

喺佳聯元朗,季前大家覺得佢哋成績會同凱景差唔多,只會係一支魚腩份子。不過郭嘉諾可以化腐朽為神奇,帶領呢支充滿年輕球員嘅球隊排喺港超第七,完全無護級壓力。期間更加曾經運用瘋狂壓迫戰術迫和班霸傑志,成為一時佳話。

喺省港盃亦都使用先穩守反擊戰術,加上適當嘅壓迫,配以死球嘅針對性佈處,成功打敗廣東。而佢執教嘅港隊反擊套路就更加俾港隊傳奇教練金判坤好,唔會一味放長傳俾前線球員一味追,會有適當嘅互傳互動,更加會叫袁振昇適當時間成為一個支點回後俾其他球員插入射波,套路可以話比近年港隊A隊進攻套路為好。工作從來都係有能者當之,而郭嘉諾絕對有能力執教香港隊!

其次,一個教練可以凝聚球員同球迷支持都好重要。比賽期間同完嗰陣就可以見到郭嘉諾同球員相處融洽,成隊波都係團結一致,向目標進發。球員完場嗰陣亦都一齊模仿郭嘉諾最著名嘅大風車手勢,可以見到成隊都好滿意郭嘉諾嘅帶領。佢熱血領軍方式亦漸漸深受球迷愛戴,由佢開頭帶隊徵戰亞運受到唔少質疑,到完場成班球迷嗌坐正就已經可以證明到呢一點。

最後你可能質疑佢無乜經驗。不過經驗真係咁重要咩?施丹喺無乜經驗之下上任帶到皇馬歐聯三連霸,蘇斯克查無教強隊經驗下上任都破紀錄教到曼聯六連勝……你話歐洲點同呀?咁本地牛丸陳婉婷夠喺無乜經驗下上台,教到東方成功拎聯賽冠軍喇!不過最緊要係郭嘉諾已經喺本地球壇多年,可以話係完全了解香港足球,完全唔洗適應期。

不過世事無乜絕對對錯嘅,假如足總洗錢請到一個好質素外藉教練,帶到新思維入香港足球都會係一件好事。不過外藉教練多數都會當港隊係佢哋路途嘅踏枱階,而本地教練郭嘉諾就會全心全意係幫香港足球發展嘅。所以講到尾,希望足總俾一個機會郭嘉諾坐正。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→