【球場血汗史】兩次留憾英超:護級專家皮雅臣 (Nigel Pearson)

守拙 於 13/04/2021 發表 收藏文章
https://youtu.be/5AUgBtlIxzo
佢球員時代曾經以隊長身份,喺溫布萊擊敗曼聯贏聯賽盃

佢先後兩次執教李斯特城,協助球隊升上英冠、英超之餘,更加成功協助李斯特城喺護級旋渦裡面死裡逃生!

佢最近教屈福特嘅時候,試過以3:0大勝當季冠軍利物浦。

佢,就係前李斯特城領隊:皮雅臣
-
皮雅臣球員時代司職中堅,職業生涯長達十七年,不過就只曾效力過三支球隊,包括梳斯貝利、錫周三同埋米杜斯堡。球員時代最威水莫過於聯賽盃決賽以隊長身份帶領錫周三喺薀布萊擊敗曼聯,過萬人面前高舉聯賽盃獎盃。
-
1998年皮雅臣高掛球靴之後,好快就執起教鞭,接掌英乙球隊卡素聯帥印。佢上任後嘅主要任務係協助球隊留喺職業聯賽,而佢最終就憑門將Jimmy Glass嘅補時入球,協助佢驚險完成任務。佢之後接受訪問時回想嗰段時期,就形容嗰陣日子過得好艱難。佢執教卡素聯嗰陣無乜經驗,又未建立到自己風格,好多時都依賴助教,佢自己完全唔知喺度做緊乜咁話。
-
離開卡素聯之後,皮雅臣就展開長達十年嘅助教生涯。佢先後擔任過拜仁笠臣、路達同「大Sam」哥艾蘭戴斯等人嘅副手。皮雅臣就好享受擔任副手嘅過程,佢可以喺旁邊觀察幾位領隊佢點樣get the job done之餘,又可以接觸到唔同嘅行事風格。不過佢強調佢並無抄襲幾位領隊嘅行事風格,而係趁著觀摩去慢慢思考自己想要嘅風格。
-
去到2008年,皮雅臣終於可以自立門户,再次成為領隊。今次係執掌修咸頓,任務同樣係要護級。不過比對上次唔同嘅係,今次要喺英冠護級,而唔係英乙。皮雅臣自己就認為今次佢累積到一定嘅經驗,比較well-prepared 。今次佢又一次完成神奇護級大逃亡!喺最後一個比賽週前仍然位於降班區、最後一場比賽面對錫菲聯先落後情況下,完場前竟然3:2反cup對手,間接踢同日失分嘅李斯特城落英甲,協助修咸頓保住英冠席位!
-
不過世事總係巧妙嘅,當季季後皮雅臣未獲修咸頓留用,反而投靠佢一手踢落英甲嘅李斯特城!佢一上任就即刻請黎佢錫週三前隊友莎士比亞成為助教,自此佢哋兩個就合作無間。皮雅臣執教李斯特城首季就協助球隊重返英冠,第二季更加帶領球隊打入英冠升班附加賽。
-
不過佢之後嗰季佢選擇加盟候城,但佢留喺候城時間並唔長。好快佢就俾李斯特城新班主維猜說服,重新執教李斯特城。
-
去到2012/13球季,皮雅臣又帶領李斯特城打入英冠升班附加賽,可惜今次功敗垂成。首回合佢地領先屈福特1:0,次回合去到補時屈福特領先2:1之際,皮雅臣嘅李斯特城獲得十二碼,只要入咗就可以晉級去溫布萊踢決賽。可惜洛卡特就係射失咗,仲要一個反擊俾甸尼得手,升班夢就咁樣破滅。
-
完場之後,皮雅臣決定要有一個debriefing。佢無詳細分析或者講一大堆廢話安慰,只係向球隊發出一個簡單而有力嘅訊息:「whatever you've got to say to each other, anything negative, get out of the way. Then when we come back, we are ready to hit the ground running.」之後嗰季,李斯特城就以英冠榜首姿勢,強勢升班上英超!
-
但喺英超作賽,又談何容易呢?李斯特城當季長期喺降班區裡面,皮雅臣就坦承嗰個球季嘅一大部份佢都唔享受,因為佢唔能夠get things right。儘管係咁,皮雅臣嘅李斯特城季尾終於揾到勝利之門,最尾九場贏咗成七場,完成咗一次相當經典嘅大逃亡。
-
可惜2015/2016球季初,皮雅臣就因為佢仔仔嘅泰國性醜聞而被落鑊,而該季新上任嘅教頭雲尼亞里就竟然帶領李斯特城神奇奪冠。皮雅臣多次接受訪問都表示當時情緒相當複雜,但係佢清楚知道自己喺李斯特城嘅歷史地位。
-
俾李斯特城炒咗之後,佢先後去過打比郡同比利時嘅魯汶,其中魯汶老闆係李城班主維猜。佢就認為喺比利時嘅經驗非常寶貴,因為球員水平唔同,皮雅臣俾戰術指示要更仔細,又要反覆確定球員係咪明白,連說話方式都要改變。撇開工作,同時間佢又要融入當地生活。不過去到第二季成績非常一般,就算同老細關係好,佢都好快就被請食無情雞。
-
2019/2020球季,皮雅臣又接到一個不可能嘅護級任務。佢要接手嘅係,位於聯賽榜末屈福特。皮雅臣一到埗就感覺得到呢份工嘅艱難,因為無論球員還是職員,都好有距離感,隊裡面猶如有幾個門派,完全唔似一支球隊。更何況根據球隊架構同運作,佢自己喺球隊係無乜影響力可言。當時佢並無時間重整球隊,球隊需要好似打火機咁,一撻就著。皮雅臣經過考量之後,決定所有戰術、指示同信息都會好簡單同非常直接。佢認為咁樣會有助隊內合作,最後的而且確收到成效。屈福特自從皮雅臣上任,得到大幅改善,一度升到聯賽榜第十六位。其中主場先後2:0贏曼聯、3:0破當季冠軍利物浦金身,更係令球迷津津樂道。
-
只係去到淨番兩輪英超,屈福特距離降班區有兩分下,管理層竟然選擇辭退皮雅臣,導致屈福特兩連敗降班收場。喺The Athletic 嘅一篇訪問裡面,皮雅臣表示自己都唔知道屈福特炒佢嘅原因。仲要被炒當日,皮雅臣去到訓練場被食Q攔住之後,打咗幾個電話先知自己唔再係屈福特嘅領隊。球隊事後嘅聲明,僅僅只有五十隻字,佢感到不被尊重,尤其考慮到自己媽媽過身後,自己無請假,頂硬上繼續為球隊博命。講句公道說話呀,皮雅臣執教屈福特嘅勝率係35%,場均得分1.25,數據上係冠絕屈福特英超歷史嘅所有其他教練。屈福特選擇辭退皮雅臣,實在係無乜道理可言
-
皮雅臣被屈福特辭退後,當時非常之嬲。經過一輪沉澱之後,佢最近又去執起教鞭,成為布里斯托城嘅領隊。
-
皮雅臣咁勵害,可以喺唔同級別聯賽都可以帶領球隊升班或者神奇護級,其中一大主要原因,就係得軍心。佢清楚每個球員嘅能力,並且會直接同你講佢想點。有次李斯特城後衛摩亞唔清楚自己喺場波做緊乜,皮雅臣就答佢:「我就係要你咁,bang, bang, bang,而家就同我去做。」同時間佢非常保護佢嘅球員,從來唔公開講球員壞話,甚至反駁或者斥罵記者去保護球員。
-
李斯特城前鋒華迪接受The Athletic 訪問係咁形容皮雅臣嘅。「皮雅臣係一個講嘢直接嘅人,從來唔會講任何bullshit,所以我從day one 就同佢合作得好好。佢會話你知要點做,只要你照做,佢就會照住你。佢係一個非常忠厚同超保護自己球員嘅人,佢係一個會為咗保護球員,而擺自己上枱嘅教練。」
-
皮雅臣唔係咩名牌教練,無贏過什麼重要獎盃,但係我眼中佢係一個成功嘅教練。無論佢去到邊,佢總係可以團結到隊波,一次又一次化腐朽為神奇。媒體或者因為佢成日得罪記者,而形容得佢好負面,但係每個同佢合作過嘅球員,都幾乎對佢讚不絕口,已經證明咗一切。所以皮雅臣嘅故事同佢嘅行事方式,絕對值得大家參考。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→