港隊4:0大勝 盡顯郭sir功架

守拙 於 15/08/2018 發表 收藏文章
香港足球隊啱啱喺亞運完成咗第二場比賽,以4:0大勝臨尾有趙明修兩黃一紅而十人應戰嘅中華台北。香港暫時兩戰兩勝,力壓印尼以6分排A組榜首,出線形勢轉趨樂觀。

今場港隊變陣出擊,教練郭嘉諾排出嘅陣容同上場相比有四個變動,安永佳、杜國瑜、余沛康同有傷在身嘅鄭展龍都無份正選登場。郭嘉諾亦將上場陣式433稍為改成4411;後防有徐宏傑改打左閘,謝朗軒取代余沛康任出右閘,上場打防中嘅列斯奧就延後一格打番老本行嘅中堅位伙拍住劉學銘。防中方面由林嘉緯負責串連工作,胡晉銘負責掃蕩。兩翼有鍾偉強同林衍廷拉邊,前鋒繼續有佐迪掛帥,身後有陳俊樂負責後上插入支援。

呢個4411陣式同人腳比起上場排出嘅433為好,運作起上黎亦更為順暢,教練郭嘉諾應記一功。今場解放鐘偉強打番左中場,令佢唔洗上場咁打左閘兼顧咁多防務,明顯發揮得幾好,佢嘅速度同技術可以幫助到港隊左手面進攻。加上起用林嘉緯擔任組織中場嘅位置,亦令港隊進攻嘅時候組織攻勢嗰陣更加有條理。前線佐迪同陳俊樂嘅合作亦比起上場更加合拍,主要係因為佐迪今場停波同射波都好過上一場,狀態開始回復,比賽裡面亦都幫港隊射入兩球。防線方面就受礙於對手進攻乏力未受過任何威脅,龍門袁皓俊隨時拎部電話打吓機,再去食個下半茶都未必會失波。


郭嘉諾嘅針對性佈處亦係繼續有效,死球同界外球都用高空優勢去針對對手。一有死球同界外球就搵身型高大嘅劉學銘頭槌二傳,再去搵人執 second ball。今場陳俊樂就係咁樣入咗兩球,估計之後兩場對巴勒斯坦同印尼都會繼續玩呢招入球方程式。

最後香港隊休息一日就要惡戰巴勒斯坦,好彩今日港隊早早領先咗四球,下半場基本上同練波一樣,體力消磨唔大,可能面對惡鬥完印尼嘅巴勒斯坦嗰陣都仲有體能優勢。呢場比賽對出線好關鍵,希望香港隊各位球員繼續努力,一路贏落去!同時亦希望睇梗呢篇文嘅你都可以一齊支持香港隊!

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→