港超中秋快車預告:東傑勢和氣收場

守拙 於 24/09/2018 發表 收藏文章

中秋節翌日有乜做?梗係睇港超喇!
港超喺呢日紅日開快車,頭場有夢想Fc 主場惡鬥和富大埔,尾場就更加有東傑大戰上演!仲等乜呀?快啲約埋啲 friend 入場睇喇!



夢想FC vs 和富大埔
14:30 青衣運動場

夢想FC 上場喺銀牌氣走香港飛馬,一洗跨季不勝嘅頹氣!今場面對今季財雄勢大嘅和富大埔,就算係主場出擊,都預料會係先穩守為主嘅。之不過今季和富大埔後防都成日唔太集中,頭兩場聯賽比賽竟然可以失咗七球!相信如果夢想FC 後防好似上場對飛馬守得咁好嘅話,希堅奴、林樂勤呢啲前線實力戰將又把握到啲入球機會,隨時一個唔覺意爆冷贏波呀!

和富大埔近三場狂轟十三球、新外援前鋒哈利上場處子登場更加大演帽子,前線嘅攻力有哂保證。大埔球迷就唔洗擔心攻嗰方面,咁就擔心守嗰方面喇!大埔後防上場面對凱景無乜威脅先無出事,之前對元朗同飛馬都好多唔集中或者甩漏,對飛馬嗰場臨尾仲差啲因為魯莽攔截而跌番兩分出黎,只係球證睇唔到先無事。大埔如果要贏波,今場後防一定要醒醒定定!


傑志 vs 東方龍獅
17:30 旺角大球場

傑志上季季中大炒東方龍獅8:1,令唔少球迷都大嚇一驚,不過相信歷史就好難重演㗎喇。事關呢傑志呢排屋漏偏逢連夜雨,除咗傑志個訓練中心俾颳風山竹摧毀之外,更加好多球員出唔到!盧卡斯、費蘭度、林恩許都受傷出唔到、列斯奧同鄭展龍狀態亦未回復、球迷期待嘅新援羅拔仔又未註冊,兵源嚴重短缺!無乜前鋒之下,新外援前鋒泰迪幾乎肯定會正選登場,球迷不妨落足眼力佢表現成點喇。陣容天殘地缺,傑志應該唔會太進取,大炒東方喺呢一刻變得無乜可能。

東方龍獅上場飽食驚風散之下先3:2反勝富力,能夠贏波有啲運氣。不過比賽之中可以見到艾華頓、笠臣呢兩位新兵未融入到東方嘅打法,有啲格格不入嘅感覺。呢場面對住冤家傑志,有著趁幾次對賽全敗嘅戰跡,或者會比較保守啲以免又再次輸波。今場波相信會縮後防線,打快速反擊為主,或者以往打慣反擊艾華頓喺前場會發揮得好啲。今場東方、傑志都未必採取主動之下,好大可能以近年東傑大戰無出現過嘅賽果,互交白卷0:0完場!

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→