楊正光帶富力難有成績

今季富力大幅增兵，務求喺港超拎到好成績，唔少人見到富力咁積極增兵，都估富力可以同傑志喺爭逐聯賽冠軍。我就唔係咁睇，雖然富力係買左好多人，但係睇下新一季個陣容，真係咁勁咩？
富力後防有盧均宜、梁諾恆、盧列斯、林志堅、羅拔圖呢啲球員。除左梁諾恆上季叫好啲之外，根本其他人全部都華而不實，無乜作用。盧列斯一向質素一般，而上季亦已經見到羅拔圖、林志堅回塘，兩位表現都俾以往失色。至於盧均宜雖然有一定嘅經驗，但係喺傑志長期坐後備，狀態都成疑問。

新加盟中場谢家強質素係有，但係對上幾季都傷多過踢，去到富力又可唔可以場場出到又係一個疑問。白鶴上季喺東方表現嚇死人，經驗老到但係不斷有低級犯錯，包括對傑志連番犯錯搞到球隊大敗一場。不過如果今季白鶴狀態繼續咁差，相信佢都幾難打正選。伊達反而係似乎富力中場人選裡面最好個個，經驗能力都好好，但係上季狀態亦好唔穩定。
後防全部老弱殘兵，前線就有羅港威、利安高、基奧雲尼呢啲實力戰將。羅港威喺前線可以提供速度、活力同闊度，利安高、基奧雲尼就有强把握力，可以話下季富力前線有一定保證。

教練楊正光教飛馬嗰時隊波已經攻强守弱，黎到富力組軍又一樣有個咁嘅問題。另外臨場調動亦係佢最弱嘅一環，帶隊對強隊通常都因為佢啲調動有問題而輸波而回。新一季富力都應該無球迷幫手打氣助威，喺各種因素下，都好難有成績。