忽發奇想:東方正在打造港超利物浦?

守拙 於 06/07/2018 發表 收藏文章


東方想打造港超利物浦?

話咁快世界盃已經差唔多到尾聲,但係係時候講吓港超先喇。雖然已經七月,但係各隊仍然好似都未哂冷公佈自己有球員加盟咁,隊隊都公佈得一兩個咁。已經公佈全隊名單嘅就只有東方龍獅,既然係咁,就講吓東方先喇。

上季東方龍獅最後四大皆空,亞冠亦喺外圍賽第二圈止步,成績令廣大球迷極為失望。東方公佈出黎嘅名單有姚浩明、謝朗軒、陳肇均、劉浩霖、艾華頓呢啲球員加入,而我認為以上呢五個球員加入係改善東方成績嘅關鍵!上季東方係衰在陣容老化、活力不足,而以上球員嘅加入係絕對可以改善球隊呢個弊病。

雖然未知下季東方教練係邊個,但係我認為呢個人腳可以打造港超利物浦。呢個班底由於擁有陳肇均同劉浩霖呢啲體力化 box to box 嘅中場,我認為東方大可以參考利物浦嘅戰術,長期使用433陣式。

先講中場,陳肇均同劉浩霖兩個可以一齊出正選登場,一齊做啲高位壓迫,而經驗老到嘅迪高就可以墮後打個6號位做派牌同補位呢啲工作,做一個連結前後場嘅靈魂人物,以迪高嘅經驗呢個位置絕對無問題。之後取得領先要多個人猜波較慢中場節奏都仲有林嘉緯可以入黎做呢個角色。

前鋒線亦可以仿效利物浦,有麥基可以充當文尼跑狗嘅角色,當中場搶截成功就傳俾佢用速度衝擊對方後防線,之後用洛迪古斯扮費明奴做支點喺禁區頂停波,再使用艾華頓變身成為沙拿,由邊線cut入中路完成最後一腳。而當比賽變得老鼠拉龜嗰陣,都有姚浩明同謝朗軒呢啲出擊能力強嘅閘位幫手拉邊,製造更多嘅空位。

後防基頓、井村就因為中場長期高位壓迫就會少咗好多壓力,兩舊防守炸彈亦少咗好多機會自爆。以上套路完全係我自己諗,但係如果東方用以上套路,相信可以同傑志至少有得打吓,唔會再輸哂速率輸到1:8咁樣衰嘅。

至不過如果最尾東方係唔用啲後生仔,繼續重用老鬼,場場林嘉緯、梁振邦呢啲老鬼打哂正選,諗住仲係用上季啲套路,咁如果你係東方迷,我就籲你自求多福喇。

圖片:元朗 facebook

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→