影音足球匯:拉荷斯紀錄片

守拙 於 07/07/2022 發表 收藏文章

眾所周知,最近Amazon Prime 出咗套普巴紀錄片,見到評論同評分之後,作為曼聯球迷真係無乜興趣開黎睇,廢事谷鬼氣啦。不過我就對另一條紀錄片有興趣,就係西班牙電視台為西班牙名牌球證拉荷斯拍嘅紀錄片,好唔好得過普巴嗰條就唔評價啦。

-

呢條紀錄片大約一粒鐘,一開場旁白就狂讚拉荷斯係世界最好球證之一,之後受訪西班牙球證界元老形容拉荷斯係喺西班牙裡面,執法風格最接近英超球證,認為有佢嘅存在,令西班牙足球有一番新嘅景象。

-

拉荷斯之後就終於出現,講佢細個就好鐘意踢波,但係佢老豆早死,原本低組別踢波嘅佢,為咗媽媽、為咗幫補家計而開始投身球證工作。佢穿州過省去執法唔同賽事,而佢對比賽嘅激情同判罰準繩度,令西班牙足協刮目相看,所以慢慢由起初執法地區聯賽,好快就平步青雲,去到職業聯賽,甚至而家嘅西甲,以致到去歐聯歐國盃呢啲大型比賽。

-

拉荷斯亦逐一分享執法生涯最難忘嘅經驗,例如西甲剎科冠軍戰、法國對德國同埋歐聯決賽等等,亦有唔少佢球證團隊嘅人讚佢執法嘅能力同態度。對於有傳媒甚至球員指控偏頗或者鐘意出風頭,佢喺紀錄片就僅僅回應一句人人都可以有佢哋嘅諗法。

-

去到紀錄片中後段,拉荷斯亦有解釋佢嘅執法風格,佢認為作為球證一定要同球員有足夠溝通,所以佢每場比賽都會同球員解釋清楚情況。如果比賽後發現錯判,佢亦會親自揾球員道歉。同時,佢又認為同球員有多啲身體接觸,球員亦會比較容易冷靜落黎。

-

最後紀錄片就有一位年輕十八歲球證同拉荷斯交流,而西班牙球證協會主席就希望拉荷斯可以多啲同年輕球證交流,甚至投身訓練球證工作,等年輕球證可以吸收佢嘅才能,令西班牙球壇未來廿年出現千千萬萬個「新拉荷斯」。

-

我就覺得呢套紀錄片始終就少訪問得濟,成套紀錄片喺交代拉荷斯人生就交代得好仔細,但係受訪人士除咗拉荷斯媽媽之外,全部清一色球證界人士,一個球員、教練甚或足球評價員嘅一手訪問片段都無,扣減咗呢段紀錄片嘅分數,始終如果有其他足球界人士參與評論,段片可能就會中肯啲,而家就感覺上有啲偏頗。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→