對比報導香港足球的媒體

守拙 於 29/04/2022 發表 收藏文章


-
好多媒體同樣係報導同一件事,但係唔同方面都可以有出入。政治新聞固然會因為媒體立場而有出入,國外體育新聞亦周不時會有,例如馬卡報就一定偏幫西班牙強隊,不過原來就連香港足球都係咁?

-

話說傑志啱啱尋日擊敗咗清萊聯3:2,下場對神戶勝利船只要拎到一分,就可以以最佳次名身份歷史性晉級亞冠淘汰賽;假如爆個冷門贏埋神戶勝利船,更加會以首名晉級添!不過唔同媒體報導呢個狀況,用詞意思大致合理,除咗體壹。

-

東網形容傑志係「晉級在望」、足球周刊就進取啲話傑志「力爭亞冠首名出線」、足球快報就含爭蓄啲講傑志「篤定小組兩名」,親共媒體HK01就話「對神户勝利船搶分爭出線」,只有體壹形容係「力爭最佳次名」。

-

首先我認為做媒體報導最緊要係儘量持平、要寫得比較客觀啲。所以足球快報、東網同HK01個寫法比較合理,因為就算作者有既定立場,佢所使用嘅字眼都比較持平。的確傑志係確定有小組前兩名,而下場對神户勝利船拎到分數機率唔低,所以呢三間媒體都係相對上報導梗事實。

-

足球周刊作者相對上就加左啲個人主觀願望,傑志下場取態係點呢?你知嗎?朱志光係想主攻搶首名,定係穩陣求和次名晉級就算呢?我哋唔係佢條蟲,所以無從得知嗎!我個人比較認同以上另外提及嗰三間媒體用字。不過始終我哋香港人,梗係有情意結,少不免都會想香港球隊盡可能有最好成績,所以可以接受呢個寫法。

-

不過體壹寫法就最離譜,形容係「力爭最佳次名」,乜而家傑志冇機會首名晉級啦咩?以神户勝利船已經確定晉級下,而日職仲要護級,下場好可能就住黎,傑志要赢並唔係無可能。點解要「力爭最佳次名」呢?呢個形容方式,完全係睇死傑志下場最多和,無可能贏。其實同時間都好誤導讀者,咁寫會令讀者以為傑志淨係可以透過最佳次名晉級,只係事實上並唔係咁。

-

其實體壹之前已經多次喺香港足球報憂唔報喜,例如本地體壇回顧對香港足球喜字粒字不提,反而將離開本地球壇一段時間嘅卓耀國還押一事納入去!今次就唔單止睇死,仲要出post有哂既定立場,妄顧事實完全唔提有可能首名晉級,反而一錘定音傑志只會「力爭最佳次名」,爭取每個踩低香港足球嘅機會。咁樣體壹班所謂記者仲唔係狗眼看人低,一心睇死香港足球咩?

留言


請按此登錄後留言。未成為會員? 立即註冊
    快捷鍵:←
    快捷鍵:→