《失意過後 J Rod 次級聯賽重新起步》

守拙 於 19/10/2018 發表 收藏文章


就咁講「J Rod」,大家通常諗起嘅會係踢梗德甲拜仁嘅占士洛迪古斯。

踢梗德甲拜仁嘅占士洛迪古斯

不過喺英國,都有個球員可以俾大家簡稱「J Rod」嘅球員,佢就係喺英冠西布朗嘅英格蘭球員積洛迪古斯喇!


首先你可能會問,點解英國人會姓洛迪古斯嘅?唔係西班牙文體系國家啲人先會姓洛迪古斯咩?其實原因好簡單,因為佢阿爺係西班牙人黎嘅,之後成家先去咗英國落地生根。唔係純正嘅血統,有其他語系嘅姓氏,都好正常啫。講起佢家族,唔差在講埋佢阿爸喇。佢阿爸都係踢過下波,曾經都係般尼青年軍嘅球員,可惜從來無上過一隊。
佢阿爸


阿爸做唔到嘅嘢,作為仔仔反而做到喎。積洛迪古斯憑住喺青年隊精彩嘅演出,般尼喺2007年向當年只有16歲仔嘅佢開出一份職業合約。佢亦冇辜負般尼嘅期望,有唔錯嘅盤扭技術、速度同走位意識嘅佢,喺有限嘅上陣時間裡面,無論擔任左翼定前鋒都有唔錯嘅表現,並且技術越趨成熟。可惜球隊喺2009年升班到英超嗰時,佢偏偏季前受傷,季中先傷癒就已經好難有狀態,結果季中俾人借走咗去英冠,錯過咗踢英超嘅機會。不過佢無氣屢,仲默默去等待機會。終於去到2010-2011球季,佢成為般尼嘅必然正選,並且喺英冠射入十四球成為球隊嘅神射手!2011-2012球季季初面對伯頓嘅比賽上演「大四喜」之後,積洛迪古斯開始收到外界注意。最終佢全季都keep住唔錯嘅狀態,成季總共入咗21球。

2012年嘅夏天,英超嘅愛華頓、熱刺、阿仙奴呢啲球會全部都話對積洛迪古斯有興趣,偏偏佢為咗有穩定嘅上陣時間,就選擇轉投升班馬修咸頓。首季加盟修咸頓佢就憑有一定嘅速度同技術,佔據住球隊嘅左翼正選席位。受制於球隊整體表現嘅不濟,長期比賽中受壓,積洛迪古斯整季表現都唔太特出,都只能僅僅射入6球。


去到2013年夏天,球隊領隊早已經變咗保捷天奴,而保捷天奴戰術進取,積洛迪古斯終於迎黎一場大爆發。佢嗰季伙拍住列基林拔同拉爾蘭拿組成一個罕有地只有英格蘭球員嘅前線組合,季前呢個組合並無俾外界睇好,一般球評家同球迷都只係覺得呢隊嘢上季先僅僅護級成功,佢哋可以有乜鬼野作為呀?但係偏偏佢哋就威俾你睇!列基林拔成為支點停波、拉爾拉拿同積洛迪古斯後上插入嘅進攻套路相當成功,佢地三人全季英超合共射三十七,其中積洛迪古斯就射入十五球,最後修咸頓意外地排第八。喺一支中游球隊,有咁嘅入球數字,絕對唔簡單。


因為佢地出色嘅表現,佢地三個開始有大球會希望收購佢哋嘅傳聞,而佢地亦開始入選英格蘭代表隊,有望征戰2014年嘅世界盃。

正當平步青雲嘅時候,命運就係要同積洛迪古斯開玩笑。季尾面對曼城嘅一場比賽,意外地弄傷十字韌帶,需要休息十一個月,錯過世界盃、2014/2015球季。出戰世界盃嘅機會、轉去大球會嘅機會一下子全部煙飛雲散。積洛迪古斯故然嘅失望,但係總要繼續生存,唯有等待復出,向外界拋下一句:「我會變得更加強。」

經過一季嘅休養,2015/2016球季積洛迪古斯終於都可以復出。只係成年冇掂過波,重新企番喺嗰球場踢番波要有番之前嘅狀態,一啲都唔容易。受過重傷之後嘅佢,佢嘅速度同反應都同之前咁好,狀態表現大不如前。雖然曾經喺歐霸外圍賽同英聯盃入過波,但喺英超整季入唔到波,擔任左翼同前鋒都做唔到應有嘅工作,表現可以以「乏善可陳」黎形容。去到2016/2017球季,雖然表現比之前好左少少,但係都唔太突出,變成一個平平無奇嘅球員,出場時間亦慢慢減少。


世界總係殘酷,2017年嘅夏天,修咸頓喺簽入更多進攻球員,積洛迪古斯再無用武之處。無用就要走,結果佢走咗去西布朗。去到西布朗正選就無走雞,不過成隊都打得好差下,加上球隊風格比較保守,冇乜供應俾到佢,佢成季大部分時間都狀態低迷。


喺2018年1月佢對白禮頓嘅比賽,佢更加捲入咗種族歧視風波。事緣比賽途中積洛迪古斯同保治嘅身體對碰之後,積洛迪古斯大聲鬧保治。保治就話佢嘅言論涉及種族歧視成份,話積洛迪古斯涉嫌講咗句:「臭黑鬼」,而呢個積洛迪古斯就強烈否認。英格蘭足總就事件經過三個月嘅調查,包括聘請專家去讀唇,事件最後係以無足夠証據而無向佢罰任何嘢。積洛迪古斯接受訪問話嗰段時間好難捱,又強調種族歧視係好嚴重嘅指控,自己絕對唔會做錯嘅事。

4月嘅時候球隊換咗領隊,而自己嘅案件亦告一段落,積洛迪古斯唔知係咪壓力消失哂一身輕,表現開始好轉。球季好似重新開始咁,幫助球隊重返正軌,喺艱難嘅護級拎到唔少分數。喺對史雲斯同曼聯化身英雄接連絕殺呢兩隊波,對利物浦亦以速度為球隊帶黎唔少反擊機會。只係之前真係拎得太少分,最終都避免唔到降班嘅命運。

降落英冠之後,唔少西布朗球員都交咗轉會申請。不過積洛迪古斯並無咁做,佢雖然都想踢英超,但係為咗尊重球隊,前途留俾球隊決定。最終球隊拒絕般尼、熱刺同紐卡素嘅報價,佢留咗喺西布朗踢英冠。佢就話會將傷痛嘅往事化成動力去爭取升班:「上季踢到好差,真係差得好恐怖。足球係殘酷嘅,差咪要接受懲罰,即係降班。今季我哋要抖正錯誤,將球隊帶上英超。我會好好記住上年嘅悲痛,然後出盡力水贏波!因為我哋要享受贏波嘅喜悅,一個我哋失去咗嘅感覺。」

今季西布朗喺英冠大熱大勇,聯賽榜排第二,升班呼聲高唱入雲。積洛迪古斯同新拍檔杜韋基爾異常合拍,兩人合共已經攻入十五球!積洛迪古斯就話因為大家都唔自私先咁合拍!

最後希望積洛迪古斯經過不斷嘅打擊之後,可以喺英冠享受足球之餘,帶球隊升番班去踢英超。我相信佢係夠能力踢英超嘅問題,之前只係信心同狀態差咁啲。希望踢季英冠加番啲信心,下季可以上番英超再大放異彩喇!

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→