基藍馬無理取鬧 指責香港足總種族歧視

守拙 於 19/11/2020 發表 收藏文章



-
今朝前港腳基藍馬突然喺我撐本地波facebook page 宣布梁嘉恆係man of the match嘅post留言連番發炮,其中一個留言大肆批評批評香港足球充滿種族歧視。佢抱怨man of the match獎項經常都係由香港出世嘅球員贏得,並且話自己從2007年到香港至2020年效力期間都未獲得man of the match獎項,最後更加批評連港隊對中國嗰場波佢都贏唔到呢個獎項。
-
我覺得今次基藍馬完全係無理取鬧,我唔知香港足球其他嘢有無歧視,但係東網揀嘅man of the match就一定無。首先今季菁英盃開鑼之後嘅man of the match,辛祖、基斯同盧斯安奴呢幾位黑人都有拎過,實在唔存在歧視。另外諷刺嘅係,佢今朝留言個post係宣布梁嘉恆拎到man of the match,而梁嘉恆係澳門人,並唔係香港球員。
-
同時間佢要搞清楚,港超man of the match並唔係香港足總官方搞嘅,而係直播單位東網揀,仲要係由講波佬負責做呢件事。真正由香港足總官方搞,就只有每年嗰幾個杯賽決賽,而足總搞嘅man of the match亦有唔同外援拎過。至於亞洲賽同國際賽某啲賽事存在嘅man of the match,亦唔關香港足總。所以基藍馬發悔氣之前,請check清楚先好鬧。就算你覺得man of the match唔公平,都唔太應該就呢件事攻擊香港足總(雖然香港足總有好多嘢做唔好)
-
況且分析邊個係場波最佳球員呢啲好主觀,每場揀嘅人選,唔啱你心水亦都好正常。基藍馬或者可能覺得有啲比賽自己踢得好好,值得拎man of the match,但係你自己咁諗,人哋作為局外人未必咁睇。始終基藍馬腳下功夫太粗,雖然佢上前助攻可能頭槌入到波,防守又夠硬淨,但係佢一拎到波好多時亂咁踢或者傳失,大大破壞球隊組織力同埋由守轉攻嘅速度,真係好難有乜比賽揀佢做man of the match。
-
基藍馬今次衝出黎,可能原意係想再一次「追尋正義」。可惜佢今次墮馬,做唔到多次正義馬之餘,仲要俾大量網民揶揄,就連球壇前輩梁守志先生都湊熱鬧留番句comment「佢真係以為自己好好波」。我覺得基藍馬今次相當無謂,完全無理取鬧。既然未獲得人哋認同,作為職業足球員,咪自己再努力囉。搬埋種族歧視出黎,難道唔驚貽笑大方?
-
追蹤守拙instagram:
https://www.instagram.com/sc_hk_/?hl=zh-hk

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→