喺天氣唔穩定，一時陽光普照、一時落大雨之下，上季排第三嘅香港飛馬同新埋班嘅凱景依然一於少理進行咗一場友誼賽，我亦有到場觀戰。結果香港飛馬全場圍攻之下大勝凱景4:0。而呢場比賽最特別地方除咗係陳肇麒、黃俊皓改任中堅之外，積斯利亦一反常態改打左閘。
肥積積斯利整個職業生涯打開右閘同防中，突然轉任左閘固然引起我嘅注意。積斯利改打左閘後今場比賽都積極上前助攻。今場飛馬進攻都成日靠邊鋒祖連奴、佐佐木周等球員落底再突然回傳俾佢，再由佢cup一cup ，去用右腳傳中去搵查維斯，唔知大家覺得呢種係唔係佢有啲似英格蘭左翼衛艾舒利楊格嘅打法。當然凱景反擊力有限先壓到咁上都無乜問題，對住其他對手或者會輸反擊輸死。
不過如果積斯利成季打左閘表現出色嘅話對港隊都有好處，始終港隊正選右閘已經有年青力壯嘅徐宏傑，防中亦有黃洋長期擔正，胡晉銘做替補。左閘方面就只有丹尼一個比較穩，而且丹尼都老，如果積斯利打到左閘，隨時做咗丹尼接班人都唔出奇。當然只係第一場熱身賽，之後係咪再用積斯利打左閘都未知，話唔定下一場就出哂事，都係睇吓之後情況係點先喇！
請按此登錄後留言。未成為會員? 立即註冊