傑志入十球其實未在狀態   南區今季勢壓倒東方進前三

守拙 於 21/09/2022 發表 收藏文章



傑志入十球其實未在狀態  

南區今季勢壓倒東方進前三


大埔0:1南區


大埔再顯防守攻架 南區攻力或比東方強


大埔繼守和東方之後,再一次面對上游球隊大打爭氣波,對住潛在爭標南區頂足大半場,可惜臨天光瀨尿,比賽尾段走甩咗倒戈相向嘅巴西帶刀侍衛杜度,最終前功盡廢全失三分,繼續開季不勝走勢。


戰況同之前東方個場一樣,而主教練李恆匯再次大玩低位防守,加比爾同李家豪續任中堅猶如銅牆鐵壁 ,加比爾再一次展視佢嘅搶截能力,而李家豪雖然身高處於劣勢,繼續用位置感同經驗補救,效果一流。中場則利用活力十足嘅陳曉峰同羅振庭去收窄空間,阻止對手進襲。成場比賽對面嘅攻擊主力佐佐木周同艾華可以製造到嘅威脅,真係十分有限,證明大埔只要泊大巴,任何港超球隊要入波都唔係咁容易,競爭力比港會同深水埗為強。今場對比東方嗰場唔同嘅係有利馬喺中場策動攻勢,不過久疏戰陣嘅佢仍然需要時間重拾比賽狀態。


可惜嘅係大埔雖然有一定反擊機會,可惜無論係鄭子森、王力威,定係後備張力行同趙少維,喺港超嚟講,火喉都未夠班,對面龍門伍瑋謙根本無乜嘢要做……至於大埔嗰位巴西前鋒保連奴對東方頭三十分鐘有一定威脅,話唔定復出之後會對大埔有極大幫助,但係如果佢長期受傷,而球隊又受資金所限未能增兵嘅話,大埔教練團真係要要諗諗計點樣用現有人腳產生威脅。因為照現有比賽走勢,幾乎有防無反,咁樣落去只會場場和波,或者比賽尾段力戰而敗...


至於南區,儘管正選十一人未必夠東方強,東方話哂都有孫銘謙、梁振邦同巴杜姆呢啲實力派球員,只係東方板凳深度薄過張紙,幾乎全部都係入世未深嘅後生仔,而南區後備席,以今場為例,至少有簡嘉亨同李嘉耀呢類未必好強、但至少有一定經驗既球員可用,點都可以補充下場上活力。另外南區又有杜度呢位巴西帶刀侍衛,可以喺進攻上帶黎唔同變化,因為就算係生波,杜度都可以失雞無神走上黎攻門。用九十分鐘計,南區入球能力隨時係東方之上,成季流流長,長命賽下聯賽排名壓過東方真係唔出奇。


香港U20 1:2 東帝汶U20

張健峰責任大


呢一場真係離譜至極,唔好話對面打得幾好,而係要鬧主教練張健峰賽前準備有幾差。早兩場已經多次搞唔掂對面快攻、長傳同身後波,一隊波重覆犯同一個錯咁多次,主教練張健峰賽後純粹用體能差做藉口更唔合理,對手難度唔係五日三賽?而就場上所見,根本都唔係體能問題,而係基本上係意識都有問題,有乜可能防守企位亂七八糟、攻守轉換系統崩潰,一而再中門大開,俾對手直闖龍潭?由對越南到最尾對東帝汶,豪無改善過。球員能力就算再有限,教練都可以做啲 damage control,改善防守戰術部署,令場面無咁難睇,例如收窄禁區頂空間,減低對手攻勢殺傷性。仲要其實呢班小將已經有趙聪悟同馬希偉呢啲喺成人賽場有經驗嘅球員,佢哋喺球會亦有唔錯嘅演出,論實力唔會差過東帝汶,唯獨到張健峰手上呢班球員好似唔識踢波咁,中場多次傳失波,亦多次毫無目的亂噤向前踢,浪費哂啲控球機會。其實張健峰上季執教香港U23成季都無乜進步,反而今季臭名遠播嘅司徒文俊上任之後,香港U23整體上踢得更好……或者足總要考慮下係咪應該俾啊張生繼續教後生仔。


深水埗0:10傑志
深水埗零競爭力

傑志其實未上力


今場波可以顯示得到深水埗呢個班底係完全未有能力踢港超,上半場傑志丹恩奴域同明加索夫都未出,誰不知一個角球就已經一擊即中,俾潘佩軒輕鬆得手搞掂你。成場波深水埗基本上都搶唔到個波,幾次拎到個波反擊都係傑志自己球員大意交失波,但係就算好彩拎到控球權,深水埗都無乜辦法,好快又俾傑志搶得番。就算係對比大埔同港會,實力上深水埗似乎都有一段距離。相信深水埗大敗只會陸續有嚟。至於傑志雖然作客攻入十球,但可以見到好多球員都不在狀態,唔少攻勢都仲可以處理好啲。以傑志今場有嘅機會,假如傑志球員係上哂力,今場真係炒夠兩打都唔出奇!

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→