三蛋贈美國 英軍歡送朗尼

守拙 於 16/11/2018 發表 收藏文章

今朝凌晨上演咗英格蘭傳奇人物朗尼嘅告別賽,主場迎戰美國。本場比賽目的係為咗去感謝朗尼為英格蘭代表隊嘅貢獻同埋幫 Wanye Rooney Foundation 籌款嘅。今場比賽去到25分鐘就有連格特射入世界波為呢場大勝揭開序幕。僅僅兩分鐘之後,又有阿諾近門撞入幫球隊拉開比分到2:0。下半場中段再有首次為英軍上陣嘅哥林威爾遜接應傳中球破網,幫英軍錦上添花,將比分擴大到3:0。結果喺英軍派三隻光蛋俾美國,歡樂洋洋嘅氣氛之下同朗尼講再見。

*鄧克表現穩定

近季喺白禮頓表現穩定嘅鄧肯終於獲得喺英軍嘅第一頂喼帽,今場鄧肯表現絕對唔失望,mark到對面前鋒卜比活特實一實。雖則佢應該好難爭贏正選中堅麥佳亞同史東斯嘅正選位,以佢今日嘅表現黎講,絕對有力可以成為佢哋兩位嘅首席替補。同樣首次上陣嘅門將麥卡菲就唔太受到太多考驗。

*連格特、辛祖雙翼齊飛

相比喺曼聯打攻中,連格特喺英格蘭打右翼表現更加好。連格特嘅視野未夠級數喺禁區頂做策劃,而今日幫手拉邊、由邊路插入射波呢啲工作就比較啱佢啲。佢亦喺右路都幾活躍下,更加射入一球世界波。辛祖今日喺左路亦都非常活躍,幫球隊製造咗唔少 chance

*哥林威爾遜
般尼茅夫前鋒哥林威爾遜今日首次為英格蘭上陣,或者有啲緊張令佢踢起上黎有啲患得患失。不過都算揾到一個入波,喺英軍生涯算有個好開始。

*朗尼

入黎之後打攻中,明顯令英格蘭組織能力有所提升。其實如果18世界盃4強落後要主攻嗰陣有佢出黎幫手組織,會唔會有第二個結局呢?可惜今場告別賽佢無入波,改寫唔到佢幫代表隊入53球嘅紀錄。

*佩利錫

美國神童成場波都好落力,亦好多次為美國製造機會,威脅到英軍後防。奈何隊友質素有限,佩利錫傳送有威脅都好,無人可以送到個波入網。


一場大勝之後,英軍好快又要喺歐國聯打啱啱贏咗西班牙嘅克羅地亞。喺時候收拾心情應付下一場嘅挑戰。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→