根度斯出走阿仙奴紀律又出事 輸波罵隊友引發更衣室危機

正所謂「人品好牌品自然好」，香港街邊掃地個阿婆都知，同樣道理可以應用於球場上。今夏從阿仙奴外借至馬賽嘅根度斯（Matteo Guendouzi），喺剛過去嘅周末失第二球後，馬上指責隊友並發生言語衝突，引起多個隊友對呢個法國中場不滿。


在剛過去周末嘅法甲聯賽，馬賽主場同朗斯對壘，最終輸2:3。據法國《隊報》指，根度斯喺球隊輸第二球時，走向謝遜（Gerson Santos da Silva），大罵：「你幾時先願意跑動？」，衝突由老大哥派耶出手先息事寧人。

衝突影片連結：
https://www.youtube.com/watch?v=QlxZxeNydfc&ab_channel=FutNews
同時，法國記者Romain Canuti指已經唔少馬賽球員已經同呢位前阿仙奴球員有磨擦及厭倦，因為有事就指責其他人嘅態度難以相處。年僅22歲嘅根度斯外借去馬賽前就問題多多，效力阿仙奴時初初被視為有潛質年青球員，但後來因為經常甩漏導致失球，再加上性格火爆，早就被阿迷冠以壞孩子之名。


而早在2020年6月阿仙奴對白禮頓時，同慕比（Neal Maupay）口角繼而出手叉頸，令人更覺得「屎波態度差」。所以，阿仙奴領隊先後將根度斯外借至哈化柏林同馬賽，而馬賽更有買斷條款，但咁嘅情況下結果可想而之。