泰亞高發神秘帖文暗示返晏菲路？伊拉奧拿或帶佢入教練團

利物浦（Liverpool）周二晚與前般尼茅夫（Bournemouth）主帥伊拉奧拿（Andoni Iraola）達成口頭協議，據《The Athletic》報道，呢位西班牙教頭已同意簽約兩年，預計本周內會正式接替史洛（Arne Slot）成為紅軍新領隊。

伊拉奧拿上任後首要任務之一係組建教練團隊，佢計劃帶埋般尼茅夫嘅助教湯美艾費歷克（Tommy Elphick）及桑谷巴（Shaun Cooper）一齊過檔。與此同時，坊間傳出有前利物浦球員可能加入教練組，為球隊提供寶貴經驗。

前中場泰亞高（Thiago）喺Instagram限時動態上載一張泳池相片，並留言「One more time」（再一次），隨即引起紅軍球迷熱議，猜測佢可能重返晏菲路（Anfield）加入伊拉奧拿嘅教練團。


泰亞高喺2023/24球季結束後被利物浦釋放，其後因長期傷患困擾，喺33歲之齡宣布掛靴。前紅軍主帥高普（Jurgen Klopp）曾喺佢離隊時大讚：「我從未見過佢咁開心，佢係一個可以去到世界任何一隊踢波嘅球員。」高普補充：「當佢決定同我哋展開新挑戰時，我欣喜若狂。從嗰刻開始，我得以近距離觀察佢，只能講一句『嘩』。最緊要係，佢憑住獨特嘅質素，幫我哋成為一支更成熟嘅球隊。我知道傷患令佢同我哋都感到沮喪，但當佢能夠上陣時，佢嘅水平係難以置信嘅——呢個先係我會記住嘅畫面。而家佢會同家人展開新方向，我哋只能祝福佢哋一切順利。」
呢個新方向，好可能就係重返晏菲路。