【考古】艾迪巴約倒戈入波，狂奔80碼慶祝挑釁舊主球迷

曾經效力阿仙奴、曼城及熱刺等大球會，現年39歲嘅多哥前國腳艾迪巴約昨日宣布掛靴。講到呢位球員嘅經典時刻，我諗大家都可能會記得2009年曼城對戰阿仙奴嘅一幕。

當年，艾迪巴約已經由阿仙奴轉會曼城，佢話自己喺阿仙奴後期並不愉快，與球迷矛盾重重。而阿仙奴球迷就指佢「出工不出力」。轉會曼城後，艾迪巴約就句句有骨咁話：「呢度啲球迷真係好愛我，同阿仙奴唔同！」。

當時有場比賽阿仙奴作客曼城，艾迪巴約一開場就帶著仇恨去踢。第12分鐘，佢就踩中法比加斯腳踝，第72分鐘，佢更凶狠地加力踩中雲佩斯臉，導致後者出血「破相」。1分鐘後，桑治從背後狠狠還艾迪巴約一腳，雙方嘅情緒逐漸激化。
第80分鐘，雲加最唔願意見到嘅一幕出現，艾迪巴約喺中路高高躍起，頂入阿仙奴大門。入波後，佢開始發狂式狂奔80碼，一路跑到球場另一端底線嘅阿仙奴球迷區，然後滑跪並攤開雙臂慶祝！


影片：https://twitter.com/birdiefootball/status/1423031239901171714

不過艾迪巴約賽後對自己嘅行為道歉：「老實講我對此感到抱歉，有時候情緒會失控，入波好高興，而比賽前大家都講咗好多，令情緒失控咗。」而雲加就話艾迪巴約呢種行為「不受歡迎」。

其實無論事後如何道歉平息事件，艾迪巴約同阿仙奴球迷嘅仇就因此可能永遠解唔開，要知道呢種狂奔向對方球迷挑釁性慶祝嘅動作，係恨入骨髓嘅死敵先會做出嘅行為。