可能是歐洲最恐怖雙人組！25場32球16助的「拿坡里雙子星」

喺意甲一支獨秀嘅拿玻里昨晨於歐聯16強首回合，憑域陀奧森漢（Victor Osimhen）及迪羅倫素（Giovanni Di Lorenzo）各建一功，作客以2：0輕取踢少1人嘅法蘭克福，各項賽事六連勝。

今季拿坡里盡顯霸氣，成為歐聯一大黑馬，昨晚一役，拿坡里17次埋門有10次中龍，行雲流水嘅進攻係佢哋其中一個成功因素，而當中球隊嘅「雙子星」組合奧森漢同基華拉斯基利亞（Khvicha Kvaratskhelia）可謂居功至偉，而24歲嘅奧森漢更係20場比賽入咗20球。


雙子星另一人雖然入球無前者多，但個人技術出眾，傳送功夫一流，昨晚拿坡里嘅第二球就係基華拉斯基利亞後腳交俾走位嘅迪羅倫素射入。

兩人合作無間，更加情同手足，昨晚基華拉斯基利亞射失12碼後頭耷耷，奧森漢立刻上前將佢個頭抬起：

奧森漢同基華拉斯基利亞嘅出色表現已引到一眾大豪門流晒口水，據聞「拿坡里雙子星」嘅身價都已經超過一億歐元，奧森漢更達1.4億歐元，但喺未遠走豪門前，奧森漢同基華拉斯基利亞一定盡力幫拿坡里捧走歐聯獎盃，大家拭目以待呢對組合可以走到幾遠。