利物浦最強中場新星已在陣中?18歲巴鍚迪為紅軍省下一筆錢

球場新聞 於 21/02/2023 發表 收藏文章
今季剛開始時,相信無利物浦球迷會覺得巴錫迪能當主力。但近期,呢名18歲嘅中場喺聯賽中連場正選,對紐卡素一役更加有上佳發揮。

巴錫迪突然爆發,一啲不太瞭解利物浦嘅球迷可能會驚訝,但利物浦鐵粉同佢嘅隊友一定唔會。沙拿就講過巴錫迪今年升入一隊後,一直係隊內表現最好嘅球員。


2021年2月,利物浦搶喺曼聯之前出手,僅花費25萬歐元,就從切爾達青訓營簽咗當年16歲嘅巴錫迪。之後佢先後喺利物浦U-18同U-23梯隊踢過中堅,表現不俗。舊年夏天,佢更隨一線隊去咗亞洲同奧地利集訓。

舊年8月,利物浦同巴錫迪續約。2022-23賽季英超首輪,利物浦作客富咸,呢名小將入咗大名單,不過可惜無得到出場機會。聯賽第4輪,利物浦主場9-0大勝般尼茅夫,巴錫迪喺比賽仲有20分鐘嘅時候後備出場,上演職業生涯處子戰。

之後去到9月,巴鍚迪出戰咗對陣阿積士嘅歐聯小組賽,成為利物浦隊史上最年輕嘅歐聯出場球員。同年11月,利物浦喺聯賽盃第3輪戰勝打吡郡,巴錫迪第1次喺正式比賽中踢正選。

拆禮物日,巴鍚迪射入喺紅軍生涯首球,助球隊3-1戰勝阿士東頓維拉,成為利物浦隊史第3年輕入球隊員,而呢個僅僅係佢嘅第7場一線隊比賽。

「佢膽子大,天不怕地不怕,」高普賽後盛讚巴鍚迪:「佢上場就係踢波,亦踢得好好。佢爸爸以前亦係踢波嘅,有遺傳基因,佢嘅態度、意識同球商都係遺傳嘅。」

今年初,利物浦狀態低迷,喺聯賽接連輸俾賓福特同白禮頓。之後,高普就對中場做咗一次大幅調整,呢次亦係巴錫迪嘅機會。

1月中旬足總盃第3輪重賽對狼隊,佢正選出場。僅僅幾日後,佢第1次喺聯賽中踢正選,面對球星雲集嘅車路士,巴鍚迪踢得一點都無怯場。

巴錫迪越踢越好,亦令教練對佢越來越有信心。上周,艾簡達拿喺訓練中受傷,高普大膽地將巴錫迪推上8號位。結果,佢充分發揮咗能衝能打嘅優勢,喺新位置上踢得游刃有餘。喺巴鍚迪嘅幫助下,費賓奴亦踢出好長一段時間以嚟嘅最佳表現。賽後,高普大讚巴鍚迪:「巴鍚迪踢得真係好好,我唔係因為佢18歲就表揚佢,而係因為佢真係踢得好。」

該仗巴鍚迪表現出一個遠超年齡嘅成熟同鎮定,拿到波時一點都唔慌,令人諗起當年嘅韋拿度姆。呢名荷蘭中場遠走巴黎後,利物浦一直搵唔到合適嘅代替者,如今,答案似乎已在陣中。

本賽季結束後,占士米拿、基達同張伯倫等人將成為自由身,而艾簡達拿、軒達臣同法賓奴嘅年紀亦唔細,利物浦嘅中場係時候重建啦。

據媒體報道,紅軍有意引進比寧咸同狼隊嘅尼維斯,以及另一個中場新援。目前睇嚟,第3名新援應該就係巴錫迪。佢有強度,有技術,而且天生心態好,場上非常淡定,前途不可限量。

「1年前,我還喺青年隊踢波,依家(踢一隊),我覺得……太不可思議了……」巴錫迪喺踢完愛華頓後喺天空體育訪問時透露。

來源:Stefan Bajcetic: Why youngster is key to Liverpool's midfield rebuild
標籤: 巴鍚迪  利紅物  

留言


請按此登錄後留言。未成為會員? 立即註冊
    快捷鍵:←
    快捷鍵:→