世盃表現出色，格子中堅成搶手貨！皇馬曼聯開9000萬，曼城更誇張！

隨著世界盃逐漸步入尾聲，歐洲各大豪門準備喺下個月開啟嘅冬季轉會窗中買入喺今屆世界盃表現出色嘅球員，除咗英格蘭金童比寧咸（Jude Bellingham），多次展現優異防守能力嘅克羅地亞20歲年輕中堅加華度爾（Josko Gvardiol），就傳出分別獲曼城、皇馬、拜仁、曼聯、車路士等強隊青睞，有望加入豪門！


目前喺加華度爾嘅爭奪戰中，據報曼聯報價9000萬歐元，車路士9500萬歐元，皇馬願送上9000萬歐元嘅報價+600萬歐年薪，而曼城方面更打算開出總報價高達1.3億歐元（包括獎金條款、球員未來轉會二次分成等）+1100至1200萬歐元年薪。

據聞「藍軍」係加華度爾最有可能加入嘅球隊，因為RB萊比錫同車路士合作關係良好，而且車仔也急於搵巴西中堅泰亞高施華（Thiago Silva）嘅接班人，但兩隊目前都宣稱無進行相關討論。

而曼城同RB萊比錫關係都密切，不過佢哋更希望球員能再留喺德甲半賽季，明年夏天先邀請加華度爾加盟。
加華度爾將喺明年1月年滿21歲，佢喺2021年以1880萬歐嘅轉會費加盟，至今為萊比錫出戰咗63場比賽。