一戰成名!頂替C朗踢正選狂入3球,拉莫斯締造多項世界盃紀錄!

球場新聞 於 07/12/2022 發表 收藏文章
2022年世界盃最後一場16強淘汰賽打響,歐洲勁旅葡萄牙對戰瑞士,頂替C朗正選嘅21歲前鋒干沙路拉莫斯(Gonçalo Ramos)上演本屆世界盃首個帽子戲法,真正「一戰成名」。

今場16強,C朗拿度無緣正選,而頂替C朗嘅係21歲嘅葡超豪門賓菲加前鋒干沙路拉莫斯,今次係佢第一次喺世界盃嘅比賽正選出場。拉莫斯出道於賓菲加青訓梯隊,2020年先升上一隊,佢喺今季嘅葡超聯賽射入9球並送出1次助攻,狀態唔錯。

要頂替隊中嘅老大哥,而且仲係葡萄牙嘅傳奇球星任正選,可想而知,拉莫斯嘅壓力有幾大!但呢個後生仔無令球迷失望。佢分別喺第17分鐘、第51分鐘、第67分鐘射入瑞士大門,完成咗世界盃歷史上嘅第53個帽子戲法,亦係本屆世界盃首個帽子戲法。

拉莫斯喺上個月先迎來國家隊處子戰,本屆世界盃小組賽出場時間亦唔多,有邊個估到,一個21歲小將首次踢世界盃就可以一場入3球!

第73分鐘,拉莫斯被換走,全場佢6次射門5次射正入咗3球,此外佢仲送出1次助攻。

除此之外,拉莫斯嘅帽子戲法仲令佢一次過締造多個世界盃紀錄:

1. 自1990年世界盃後,首個喺淘汰賽中嘅帽子戲法。
2. 1966年嘅尤西比奧之後,葡萄牙隊史第二位喺世界盃淘汰賽單場入三球嘅球員。
3. 自2002年嘅高路斯之後,第一個首次喺世界盃正選就完成帽子戲法嘅球員。
4. 成為世界盃淘汰賽中戴帽第三年輕嘅球員
5. 成為歷史上第二位喺世界盃淘汰賽單場戴帽並送一個助攻嘅球員。上一次有如此神跡的球員係意大利嘅史基亞維奧,佢喺1934年世界盃上對戰美國嘅比賽中戴帽同時有一個助攻。

loading
根據德國《轉會市場》嘅數據,拉莫斯嘅評估身價已經達到2400萬歐元。如今一戰成名,相信身價一定會暴漲!

留言


請按此登錄後留言。未成為會員? 立即註冊
    快捷鍵:←
    快捷鍵:→