大器晚成 — 達米安馬天尼斯！一直被流放的阿根廷鋼門 精選

世界盃進入淘汰賽階段，一場定生死。強隊荷蘭同大熱門阿根廷分途出擊，阿根廷除咗美斯一如既往穩定發揮之外，全靠後防兩個「馬天尼斯」救咗球隊一命。先有效力曼聯嘅中堅利辛度馬天尼斯（Lisandro Martinez）準確攔截，及時將澳洲隊嘅射門封出底線，後有守門員達米安馬天尼斯（Damián Emiliano Martínez）撲到澳洲年僅18歲嘅小將加朗古奧（Garang Kuol）近門施射。今日呢篇短文要介紹嘅，係後者，18歲就加阿仙奴嘅達米安馬天尼斯。



達米安馬天尼斯18就已經加盟英超勁旅阿仙奴，可惜由於球隊競爭實在激烈，佢被長期外借去唔同球隊，而且全部都係次級聯賽嘅球隊，包括英乙嘅牛津聯、英冠嘅錫周三等，中期短暫外借到英超嘅狼隊同西甲基達菲，但機會一樣寥寥無幾。2017年4月5日，馬天尼斯喺狼隊主勝韋斯咸3比0嘅聯賽時，首次英超聯上陣。
2019年1月23日，馬天尼斯再次被外借至次級聯賽球隊，英冠嘅雷丁。1月29日，佢喺雷丁對陣保頓時首次上陣，並於數日後對陣阿士東維拉時獲得全場最佳球員。

2020年，馬天尼斯回歸阿仙奴，並終於迎來突破嘅一年。2020年6月20日，阿仙奴正選門將利奴喺對陣白禮頓嘅比賽中受傷，馬天尼斯後備入替，係佢自2016-17賽季後再次於英超上陣。直至賽季完結，馬天尼斯一直擔任阿仙奴嘅正選門將，其出色嘅表現亦得到外界嘅稱讚。同年8月1日，馬天尼斯以正選上陣2020年英格蘭足總盃決賽，助球隊贏得第14次冠軍，賽後佢於捧盃時激動落淚。

由於喺球隊出色嘅表現，馬天尼斯獲得國家隊教練嘅青睞，於2020年10月，馬天尼斯再次獲得阿根廷國家足球隊徵召。2021年6月，馬天尼斯入選咗阿根廷美洲國家盃嘅大名單。 7月10日，佢以出色嘅表現幫助阿根廷隊獲得美洲盃冠軍，並當選美洲盃最佳門將！
今屆，達米安馬天尼斯可唔可以為阿根廷同美斯圓世界夢，目前仍言之尚早，但佢嘅勵志故事肯定可以激發年青球員繼續追尋自己嘅足球夢。