你好得閑夏生？「好孩子」夏蘭特由禁區跑出來幫球證執嘢

入波對於夏蘭特（Erling Haaland）嚟講好似係手到拿來嘅嘅事，昨晚嘅歐聯賽事，佢甚至得閑到可以由禁區跑出來幫球證執嘢！（相關文章：好波、有禮、識尊重人！夏蘭特就是值得你喜愛的球星）

自從由多蒙特加盟曼城以來，呢位挪威國腳喺短短12場比賽入邊已經入咗令人難以置信嘅19球，昨晚對哥本哈根嘅賽事，夏蘭特7分鐘就入波，只係踢咗半場已經梅開二度，助曼城大勝對手5-0。

當曼城領先1-0嘅時候，立陶宛球證 Donatas Rumsas 被撞至跌咗身上嘅罰球噴霧，夏蘭特見狀，竟然由禁區內跑返出嚟，幫球證執返支噴霧，然後跑去球證身邊拋返俾佢，之後又跑返去禁區協助進攻。