一個時代的落幕!葡萄牙國家隊棄用C朗做封面海報

球場新聞 於 02/10/2022 發表 收藏文章
2022年卡塔爾世界盃即將開波,今屆主辦方要求各支國家隊用隊內一位招牌球星做宣傳海報,之後官方會將呢32張巨大海報貼喺多哈市中心。讓人意外嘅係,葡萄牙隊並未讓C.朗拿度(Cristiano Ronaldo)擔任海報人物,佢哋打算用般奴費南迪斯(Bruno Fernandes)或者迪奧高祖達(Jota)來代表葡萄牙。

《每日郵報》表示,卡塔爾世界盃官方正在為世界盃32強製作巨幅海報(75英尺高),而海報嘅球員就由各隊自己來定,C.朗係葡萄牙陣中名氣最大嘅球星,但葡萄牙隊今次就無用佢嚟做海報人物,呢個舉動多少令人有啲意外。


唔使筆者多講,大家都知C.朗係葡萄牙隊嘅傳奇人物,佢目前一共為國家隊出場191次,射入117球。從2003年首次代表葡萄牙到依家,C.朗過往20年都係葡萄牙足球嘅象徵。然而,如今已經37歲嘅C.朗已走到職業生涯嘅後段,無可否認,佢喺國家隊嘅重要性亦越來越低。

最近嘅2場國家隊比賽,C.朗顆粒無收,即使有黃金機會亦把握唔到,狀態十分低迷(有關文章:廉頗老矣!37歲C朗錯失4大黃金機會,賽後沮喪拋擲隊長臂章!),甚至有調查顯示有高達57%嘅葡萄牙球迷建議主帥將C.朗放喺後備席。而最近9次代表國家隊出戰,C.朗僅射入2球。從葡萄牙今次無用C.朗做海報人物嘅決定可以睇得出,佢哋正為國家隊選擇一個新嘅方向、甚至一個新嘅領軍人物。

比起C.朗,般奴或者祖達更年輕,且狀態更佳,的確係可以接替C.朗嘅衣缽。而對C.朗嚟講,佢依家最重要係要擺正心態,以樂觀嘅態度應對呢個轉變,畢竟佢真係已經不再年輕。本周,《太陽報》更爆料稱葡萄牙隊內有部分球員已經對C.朗不可動搖嘅隊內地位提出咗質疑。

至於C.朗嘅宿敵美斯(Lionel Messi)會否成為阿根廷嘅海報人物呢?目前,阿根廷方面無俾答案,不過筆者覺得用美斯嘅機會甚大。而英格蘭、克羅埃西亞、烏拉圭、塞內加爾則已經確定咗海報人物,佢哋分別是哈利簡尼(Harry Kane)、摩迪(Luka Modric)、蘇亞雷斯(Luis Suárez)、文尼(Sadio Mané),另外,巴西亦基本決定用尼馬(Neymar)做佢哋嘅海報人物。
標籤: C朗  

留言


請按此登錄後留言。未成為會員? 立即註冊
    快捷鍵:←
    快捷鍵:→