其實唔差？數據顯示麥佳亞防守能力與雲迪克不相伯仲！

近日，曼聯中堅麥佳亞（Harry Maguire）喺國家隊嘅表現備受批評，但數據顯示，麥佳亞嘅防守能力其實唔差，因為佢嘅數據，同被譽為「英超第一中堅」嘅雲迪克（Virgil Van Dijk）不相伯仲！


由數據公司 Midnite 嘅統計數據顯示，利物浦中堅雲迪克喺總共202次英超賽事中，做出206搶斷，成功率為69%，表明佢閱讀球賽嘅能力非常高。

然而，麥佳亞比雲迪克多踢四場比賽，一共做出254次搶斷，成功率只比雲迪克差2%，達到67%。

至於攔截對手方面，雲迪克每場有1.59次，而麥佳亞亦有1.58次。

令人驚訝嘅數據不止於此，雲迪克贏得74%嘅空中對抗，而麥佳亞則是72%。

種種數據都表明，麥佳亞係一個中上級數嘅防守者。但踢波當然唔係淨淨睇數據，有某啲表現係數據未能反映出嚟嘅，例如攔截後嘅跟進、佢同隊友嘅溝通等等。我哋睇波嘅球迷都見到，麥佳亞「慢」呢個缺點經常被對手無限放大，加上佢指揮後防線嘅混亂，往往令隊友不知所措。
喺球會層面，新帥坦赫似乎已經搵到曼聯嘅最佳中堅組合，華拉尼（Raphael Varane）加馬天尼斯（Lisandro Martinez）嘅防守的確好穩陣，睇嚟麥佳亞要諗下自己點先可以重新得到坦赫嘅信任。