好波、有禮、識尊重人！夏蘭特就是值得你喜愛的球星

夏蘭特（Erling Haaland），呢位有射術、有爆發力嘅曼城前鋒，可能係當今世上最令後衛頭痛嘅球員，今時今日嘅佢炙手可熱，佢絕對有本錢耍大牌、擺球星款，但呢位22歲嘅年輕人不但無因為自己爆紅而囂張跋扈，仍然謙遜有禮，以下呢條影片可以證明：


當工作人員在訓練後收返訓練服嘅時候，幾乎所有曼城球員都係咁將件衫放落地留俾工作人員執，有啲甚至將件衫隨手一拋，掟到工作人員嘅面上，唯獨夏蘭特係親手將件衫交俾工作人員手上，隨後亦得到工作人員拍背表示讚賞。
22歲嘅夏蘭特雖然已貴為一線球星，但仍然好似仲擁有一顆赤子之心，過往嘅採訪都顯得非常靦腆，而且十分坦率直接。佢嘅呢種性格同佢嘅球風非常相似，場上嘅夏蘭特簡單、直接，甚至有啲粗暴，對上一場歐聯比賽嘅賽後訪問，佢就提過，自己嘅夢想就係一場波觸球5次，取得5個入波，可見佢十分了解和認同自己嘅踢法同優點。

夏蘭特今季仍然入球停不了，歐聯嘅神奇入波更加奠定咗佢頂級前鋒嘅地位，呢種只有伊巴謙莫域（Zlatan Ibrahimovic），或者雲巴士頓（Marco van Basten）級數球員先做到嘅入波，依家喺呢位22歲球星身上見到，足見佢前途必定無可限量！