【考古】可能是史上最難複製的「神蹟」！阿根廷前國腳單場炒三球12碼

馬田巴拉莫（Martín Palermo）呢個名香港球迷未必咁熟，佢係一位身高腳長而且可以左右開弓，射術出色嘅中鋒，但呢位前阿根廷國腳竟然擁有一項不光彩嘅世界記錄：佢曾經喺1999年嘅美洲國家盃，對哥倫比亞的比賽當中，連續射失三球12碼。第一球擦楣彈出，第二球更加係大炒飛機，最後一球雖然中龍，但就被守門員救出：



自此以後，唔知係唔係信心問題，巴拉莫炒12碼嘅情況屢有發生。

綽號「El Loco」（瘋子）嘅巴拉莫成名於小保加，及後短暫加盟過西甲球隊維拉利爾同貝迪斯，之後再重返小保加。巴拉莫係小保加球迷心目中嘅英雄，唔只因為佢係球隊嘅入球泉源，仲係因為佢喺面對宿敵球會河床嘅比賽經常有波入，因而被視作河床嘅剋星。但巴拉莫係國家隊就長期活喺巴迪斯圖達（Batistuta）同基斯普（Hernán Crespo）嘅影子下。