又發細路仔脾氣？麥巴比突然放棄進攻，只因域天拿傳俾美斯唔傳俾佢！

喺週六主場5:2大炒蒙彼利埃嘅賽事中，PSG嘅天之驕子麥巴比（Kylian Mbappe）喺一次反撃中突然放棄進攻，引起球迷議論紛紛。

話說當半場結束前，PSG有一次反擊機會可以擴大比分。當時今季先加入嘅中場域天拿（Vitinha）攞到波推進，佢可以選擇傳俾左手邊舉晒手嘅麥巴比，又或者右手嘅美斯（Lionel Messi），但佢遲遲未交波，此時麥巴比已經大表無癮，而且開始放棄進攻，最後域天拿傳咗個波俾美斯：



呢個畫面其後喺社交網站瘋傳，有球迷指責麥巴比仲係細路仔咁，唔夠成熟，亦有球迷叫你唔好學到尼馬（Neymar）咁自負，更有球迷話佢呢啲態度對球隊嚟講係有毒嘅等等，總之都係一片批評嘅聲音。

今仗麥巴比表現亦麻麻，射失12碼，後來先射入一球將功補過。筆者希望呢位咁有前途嘅後生仔要保持謙虛，咁先可以更上一層樓。