嬲到爆！C.朗賽後拒到客場球迷區道歉，亦拒與坦帥握手！

真係無眼睇！昔日班霸曼聯開季兩連敗，不特止，第二場仲要輸到0-4俾賓福特，賽後直接排榜尾，真係奇恥大辱，搞到季初已經鬧離隊嘅球王C.朗拿度（Cristiano Ronaldo）都好無癮，從佢賽後嘅肢體動作已經可以睇得出。

根據《曼徹斯特晚報》報導，賽後曼聯助理教練麥卡倫要求球員去到客場球迷區，就今次垃圾嘅表現向球迷道歉，但C.朗無理佢，獨自一人反方向行，期間攤手表示不滿，之後佢經過曼聯主帥坦赫身邊，亦無同對手握手，全程一人失望地回到更衣室：


呢位37歲嘅球王今夏已經成為媒體話題，因為佢已放晒第話要第二次出走曼聯，然而尷尬嘅係無任何一支歐洲球隊表示對佢有意，只有一個來自沙特阿拉伯嘅邀請。

曼聯開季輸咗兩場後，30年以來首次積分榜墊底。佢哋今夏雖然已經填補咗一啲人腳，但依然踢唔出表現，筆者就話，曼聯搞成咁，唔係球員能力有問題，而係信心問題，佢哋已經踢到失去信心，同時亦失去鬥心，呢個問題唔係咁易解決。