速度驚人！一條片睇清法蘭基迪莊爆發力有幾強

巴塞隆拿同法蘭基迪莊（Frenkie de Jong）嘅合約糾紛依然未搞清楚，但後者一於少理，喺週一凌晨嘅甘柏盃，協助球隊主場以6比0大勝墨西哥球隊普馬斯，佢個人除咗有入波，仲有一次精彩表演。

荷蘭國腳迪莊一向以控制節奏以及傳控聞名，但唔表示佢速度慢。喺隊內熱身賽嘅練習中，迪莊嘅速度甚至比以速度聞名嘅丹比利（Ousmane Dembélé）更快（《FIFA 22》中，丹比利同迪莊嘅速度分別係93同81）：


而喺甘柏盃嘅賽事中，迪莊亦有展現佢驚人速度爆發嘅時刻。喺下半場第8分鐘，迪莊喺後場接應隊友傳波，之後佢順勢轉身首先避開一名對手，之後再突然加速狂推，一次過由自己後場推到對方三閘線，再一個靚直線俾到隊友，只可惜未能製作入波。




根據 speeddsb.com 嘅數據，迪莊上賽季喺歐聯賽事中嘅最高速度為31.80公里/小時，可想而知呢位中場好手速度一向驚人，只係平時比較少露一手啫。

迪莊嘅去向同合約問題暫時仲未明朗，雖然曼聯同車路士都表示對佢有興趣，但前者依家仍堅持留隊，消息指佢要巴塞找埋佢2,000萬歐元嘅欠薪先肯離隊。