澳洲杜迪克！120分鐘上場，手舞足蹈救12碼成國家英雄！

今日淩晨嘅世界盃附加賽，澳洲通過12碼大戰擊敗秘魯，連續5屆打入世界盃決賽週。澳洲後備守門員雷馬尼（Andrew Redmayne）成為國家英雄。

喺第120分鐘先登場嘅他，喺12碼大戰中好似杜迪克上身咁，不過佢唔係扭蛇腰，而係不斷手舞足蹈，用自己魔性嘅舞蹈干擾對手，最終成功撲出咗秘魯嘅第6輪12碼。

相關文章：除咗救12碼勁仲好蠱惑！澳洲門將趁對手唔覺意丟咗佢張「貓紙」


呢場波只係33歲嘅雷馬尼第三次為澳洲國家隊出場，呢位鬍鬚門將喺撲出12碼後嘅搞笑表情亦喺社交網絡上走紅。



其實大戰前換門將經常發生，做得好，球迷會話教練神操作，如果衰咗，教練就係被鬧到飛起。筆者記得其中一個最成功嘅例子係2014年世界盃嘅荷蘭，當時雲高爾（Louis van Gaal）喺關鍵時用告魯爾（Tim Krul）換施利臣（Jasper Cillessen），結果告魯爾不負眾望，撲出咗哥斯達黎加兩球12碼，最終幫助荷蘭隊4：3擊敗對手，殺入四強。
其實雷馬尼唔係今次先咁過癮，佢一直用呢種手舞足蹈嘅方式撲12碼，，更曾經連續3次撲出12碼，佢嘅特色甚至被球迷改咗個花名叫「灰色搖擺」。