【紅軍獵物】巴塞17歲天才加維上一場創「狂牛」紀錄，今場自己禁區頭頂腳踢瀟灑過人！

歐洲國家聯賽，「狂牛」西班牙兩連和之後，昨日終於打開勝利之門，憑住沙拉比亞嘅入波，作客以1-0作客擊敗瑞士！

中場新星加維（Pablo Gavi）上一場以17歲零304日之齡，改寫隊友安素法迪（Ansu Fati）保持嘅國家隊史上最年輕入球紀錄，今場繼續有好表現。

加維唔止個名似沙維，踢法都似，以下呢幾下仲有西班牙另一名宿恩尼斯達嘅影子。當時加維喺自己禁區搶返球權，佢大可以直接解圍，但係佢藝高人膽大，喺人叢中頭頂腳踢突圍而出，最終對手用超技術先可以攔截到佢推進：



加維本身係貝迪斯嘅青年軍，11歲先加入巴塞隆拿。巴塞知道此子絕非池中物，所以已經同佢傾緊一份5年嘅合同，呢份約仲包括一條高達10億歐元嘅釋放條款，可想而知巴塞對佢嘅評價有幾高！

雖然巴塞開出天價表示無意放人，但依然傳出英超嘅利物浦對加維甚有意思，據說佢哋正留意呢位西班牙天才同巴塞嘅意向。