瑞典後衛鬧夏蘭特係「臭雞」？仲威脅踢斷佢隻腳？

喺昨天進行嘅歐國聯比賽中，挪威作客以2-1擊敗瑞典，挪威陣中皇牌夏蘭特（Erling Haaland）梅開二度，不過賽事嘅焦點並不是佢有幾勁，而係佢喺賽後透露，瑞典後衛米路斯域（Alexander Milosevic）喺比賽途中曾辱罵佢，並威脅踢斷佢隻腳！

呢位今年夏天以5100萬英鎊嘅價格加盟曼城嘅前鋒，指責米路斯域嘅不禮貌言行。睇返錄影片段，米路斯域至少有兩次對夏蘭特指手畫腳，但從畫面中睇唔到佢兩個嘅對話。


然而，夏蘭特喺賽後係咁講：「佢話我係臭雞（whore - 意指收錢提供性服務嘅女性），我話我可以向你保證我唔係，跟住佢就話要踢斷我隻腿，然後我喺一分鐘之後就入波啦。」

夏蘭特射入第二球時，面對嘅正正就係米路斯域嘅防守。入波後夏蘭特的確係特登盯咗米路斯域一眼，隨後就開始狂奔慶祝並做出了「收聲」嘅手勢。


不過，米路斯域否認曾辱罵夏蘭德，反指佢嘅言論好無禮：「因為我唔識講挪威話，而佢又唔識講瑞典話，因此我都唔知我哋可以點溝通。我喺球場上亦唔會講英語，所以佢亂講，我根本無講過呢啲說話，佢嘅言論真係令我好驚訝。」

夏蘭特似乎無俾呢場口水戰影響到佢，佢喺更衣室聽住 Oasis 嘅《Wonderwall》，仲同佢啲挪威隊友慶祝勝利。

贏咗呢場挪威喺聯賽B組名列前茅，至今佢哋兩場比賽都贏波，並領先塞爾維亞同瑞典3分。