【考古】當年今日曼城88分鐘派1號門將占士踢前鋒,結果一個窩利撻Q冧低兩件!

球場新聞 於 16/05/2022 發表 收藏文章
昨日,曼城2-2同韋斯咸打成平手,只攞到一分,爭冠之路亦有隱憂。

想當年,2004-05賽季,英超最後一輪,曼城亦都有另一個任務,就係要擊敗米杜士堡,拿到歐洲足協盃資格。時任教練皮爾斯(Stuart Pearce)當時就出奇策,就係搵守門員大衛占士(David James)出任前鋒。

當時距離完場仲有2分鐘,皮爾斯大手一揮,用後備門將韋弗(Nicky Weaver)換走中場連拿,然後就叫占士去踢前鋒。其實曼城早就預準咗件波衫,所以呢個戰術係早有計劃。

結果,波衫係早有準備,但睇嚟占士就無乜準備。佢喺前線顯得不知所措,而且粗枝大葉嘅踢法仲誤傷咗對手幾個球員:

雖然曼城最後時刻攞到個12碼,可惜科拿嘅射門被撲出,結果米杜士堡入咗歐洲足協盃,而且仲一路打到決賽。

皮爾斯賽後解釋:「我係想要掂亂對手,從某程度上我哋的確做到。呢個戰術搞亂咗所有人,包括佢哋同我哋。」

而被推上前線嘅占士就話:「中場嘅時候,工作人員有提過幫我印咗一件唔係龍門嘅1號波衫,我當時諗:即係點?佢之後暗示我可能會踢前鋒。後來我見到韋弗上場,我心諗係唔係換我呢?講真,其實我事前真係一無所知。」

「如果我早一日知嘅話,我會訓練多一個鐘預演下。我之後同皮爾斯傾過幾次,我同佢講其實我唔係好知我要踢邊個位。」
標籤: 大衛占士  

留言


請按此登錄後留言。未成為會員? 立即註冊
    快捷鍵:←
    快捷鍵:→