怪錯好人？里奧費迪南：我要向摩連奴道歉！佢一早睇到曼聯嘅問題 精選 推薦

曼聯自從費格遜退休後就陷入長期嘅泥濘中（呢句說話唔知要打多幾多次），多年嚟一直換領隊，可惜依然未搵到個啱（持份者同球迷）心水嘅人，而摩連奴可以話係咁多領隊之中，一度令曼迷睇到希望嘅 "The Chosen One"，可惜最後都係不歡而散。

近日，曼聯嘅名宿里奧費迪南就表示佢要向摩連奴道歉！點解？因為當年2019年，摩佬被曼聯炒魷之後表示，帶領曼聯獲得英超第二係他教練生涯最大嘅成就之一，因為曼聯背後有好多問題。呢番言論喺當時遭到好多紅魔名宿批評，當中包括里奧費迪南。但如今，睇到曼聯不堪嘅情況，里奧就公開向摩連奴道歉，並承認摩佬一早就睇到曼聯嘅問題。

「摩連奴嘅說話令我非常非常深刻！就我個人而言，從某種程度上，我要向佢道歉，為我當時看待同評價佢嘅方式道歉。雖然，我依然認為佢喺處理人際關系以及一啲紛爭嘅時候存在不妥之處，但從隨後嘅情況嚟睇，佢講帶領曼聯拿第二係偉大成就嘅言論係非常正確嘅。」
「我哋都睇到，曼聯內部發生咗一啲（外人）睇唔見嘅問題。當時我哋並唔知道問題嘅嚴重性，但摩連奴顯然已經察覺到。佢想要引入一啲球員，又想清理一啲球員。另外，曼聯球員嘅高人工資以及薪資架構都有問題。呢啲令摩帥諗『嘩嘩嘩，點解會咁架？』」

「我希望有機會可以同摩帥傾下佢喺曼聯嘅日子，睇睇我哋點解會行到今天呢一步。佢肯定比我哋睇到更多細節，呢啲對我哋有好大幫助。」

同場加映：狂人也落淚！摩連奴有望成為史上第一個歐洲「3大滿貫」教頭

正所謂「錯過方知珍貴」。唔止里奧，當日摩連奴喺曼聯嘅日子仲受到好多唔同方面嘅壓力，包括球迷。其實筆者覺得，有一個最大嘅問題係，大家似乎未認清楚一個事實，就係：你無可能搵到第二個費格遜。摩連奴又好，蘇斯克查又好，或者來緊嘅坦赫亦好，究竟大家可以容忍曼聯用幾耐時間重建？接唔接受到曼聯嚟緊幾季都可能喺中游浮沈？
要搵個人頂得住呢啲壓力，坐得穩呢個位，唔係咁易。或者狂人摩連奴就係當初最好嘅選擇。