未輸人先輸陣？哥帥睇完安76賽前訪問後突然情緒低落

62歲嘅安察洛堤（Carlo Ancelotti 花名：安76）係有啲計！

呢位「橋王」昨晚又完成了一次創舉，帶領皇家馬德里逆轉實力強橫，由哥迪奧拿（Pep Guardiola）帶領嘅曼城，再一次打入歐聯決賽，對陣另一支英超勁旅利物浦。

哥迪奧拿係當今最炙手可熱嘅教練，但面對老謀深算嘅安察洛堤，似乎都無晒計。唔知係咪預知到第二回合場波難踢，呢位一向自信滿滿嘅教頭賽前竟然被影到喺後備席情緒低落。



有人話佢喺賽前睇咗安察洛堤嘅訪問之後就陷入深思模式，不過無人知道究竟邊個點引起哥帥嘅情緒，亦無人知安察洛堤私底下有無同佢講過啲咩搞到佢咁，但可以肯定嘅係安察洛堤喺賽前，俾皇馬球員睇咗一段激勵嘅影片。


其實喺賽前發佈會，哥帥就對安察洛堤讚口不絕：「我好佩服佢！佢一直喺世界各地帶領唔同嘅強隊，你要知呢樣工作唔容易。佢係一個好特殊嘅人，我好多年前就見過佢，佢個人好冷靜，完美地控制住自己嘅情緒。」

有球迷就話哥帥經常會陷入呢種「過度思考」嘅模式，亦即係我哋成日講嘅「諗多咗」！或者呢一個就係哥迪奧拿唯一嘅缺點。