大腳解圍有幾難?Ionut Radu 低級過街波嘅失誤,可能令國米斷送冠軍!

球場新聞 於 28/04/2022 發表 收藏文章
各大聯賽都去到白熱化階段,其中意甲由兩大傳統勁旅,AC米蘭同國際米蘭爭持得最激烈,邊隊稍有差池就會即刻被推到擂台邊,今日,呢支不幸嘅球隊係國際米蘭。

國米作客對博洛尼亞嘅比賽,直至完場前9分鐘,兩隊仲係打成平手,可惜就喺呢個時候,取代漢丹奴域上陣嘅國米門將 Ionut Radu 竟然犯下一個你喺香港街場都唔會見到嘅失誤。當時比列錫(Ivan Perisic)開界外球,加利亞甸尼(Roberto Gagliardini)有意讓個波俾身後嘅 Ionut Radu,佢本來想大腳解圍,點知出腳時間判斷錯誤,將個波向自己龍門踢去,對手辛桑尼(Nicola Sansone)見機不可失,一個唔客氣就射入空龍,結果國米就咁送咗一分出去。


官方精華:
https://www.youtube.com/watch?v=PJkTt9rxLtQ
依加國米有72分,剩返四場比賽,落後AC米蘭兩分,所以 Ionut Radu 呢球失誤隨時令國米斷送冠軍。

Ionut Radu 現年24歲,由於漢丹洛域(Samir Handanovič)係國米鐵一般嘅主力,如果唔係因為後者受傷,Ionut Radu 好少有出場機會,所以佢喺國米七年,只係出過五場賽事,亦可能係因為咁而缺少實戰經驗,導致比賽時容易緊張出錯。然而,若果喺佢一隻手都數得晒嘅實戰中,就令國米無咗個冠軍,呢個代價你都咪話唔大!

標籤: Ionut Radu  國米  

留言


請按此登錄後留言。未成為會員? 立即註冊
    快捷鍵:←
    快捷鍵:→