怪雞罰球收服辛尼特！與人牆並排嘅6人突然一齊走去開罰球？

話說俄羅斯盃8強賽事爆出大冷門！來自俄甲嘅球隊阿拉尼亞（FC Alania），通過12碼大戰淘汰咗俄超嘅領頭羊辛尼特（FC Zenit）！

其實直到比賽嘅第92分鐘，辛尼特仍然2-1領先，呢個時候，阿拉尼亞禁區頂得到一個罰球，而佢哋就用咗一個怪雞戰術將個波送咗入網，而正正就係因為呢個罰球，將比賽拖入加時賽，最終仲喺12碼大戰以6-5勝出！

講返呢個罰球，當時阿拉尼亞有6人去到對方人牆位置，這與一般罰球戰術無疑，然而之後，呢6個球員突然一齊走去開罰球，之後阿拉尼亞第一個球員衝去假裝射波，其後三個人同時衝去，最後係第二個射，最終佢以一腳靚波射死角入。


嗱，坦白講，筆者就睇唔到呢個入波同呢個戰術有乜直接關係，唯一可以話呢個戰術奏效嘅係佢可能擾亂咗對手嘅思緒。不過唔理咁多，最終個波就係入咗，呢個先係最重要。