22歲英俊新星迪肯賴斯賽後一句話引曼聯迷無限遐想

雖然曼聯最後有驚無險以1-0戰勝韋斯咸，不過後者嘅中場球員兼隊長迪肯賴斯（Declan Rice）就得到高度嘅評價，佢賽後仲講咗一句說話，令到不少曼聯球迷感到興奮。

現年22歲迪肯賴斯可以話係英格蘭嘅新星，甚至係未來國家隊隊長嘅人選，佢高大靚仔之餘，球技亦非常了得，年紀輕輕已經成為韋斯咸嘅副隊長，因此佢喺英格蘭球迷嘅心目中已經奠定咗一定位置，理所當然地各大球會已對佢十分關注，當中佢嘅追求者就包括曼市雙雄同車路士。

今場賽後，迪肯賴斯被天空體育問題有關奧脫福嘅問題，佢就咁答：「我很喜歡它。每次我嚟到奧脫福，我總係話呢度係我最喜愛嘅比賽場地之一，呢個係一個了不起嘅球場。」（I was loving it, Every time I come to Old Trafford, I've always said it's one of my favourite places to play. It's an amazing stadium.）


當然你可以話迪肯賴斯只係門面說話，不過球迷一於少理，佢呢句已引起曼聯球迷嘅無限遐想，其中90年代效力過曼聯嘅保羅柏加（Paul Parker）就叫曼聯無論如何都要得到呢位英格蘭最佳中場。不過迪肯賴斯同韋斯咸嘅約去到2024，有傳球會對佢嘅開價係至少一億。