翻版夏薩特？巴塞大敗，但朗格勒卻與利雲摟頸大笑！

對職業球員嚟講，輸波出局理應係唔開心，但如果又輸波又出局又被大炒，賽後仲同對手摟頭摟頸，好似街場友誼波咁，你係球迷唔知你會點諗？

巴塞隆拿昨晚歐聯以０—３大敗於拜仁慕尼黑腳下，雙方實力明顯有分嘢，輸波都係意料中事，而賽後互相問候一番也是禮貌之舉，本身並無不妥，不過好似朗格勒咁就明顯過咗少少火。巴塞嘅第一球失波，佢有明顯責任，正正因為佢同明基沙無卡好位，梅拿先可以輕鬆頂入。

賽後，朗格勒同拜仁前鋒利雲杜夫斯基被鏡頭影到摟頭摟頸，前者仲笑得鬼死咁開心，好似失波唔關事咁，輸波又唔關事咁。呢張相片隨即喺社交媒體瘋傳，而朗格勒亦被批評唔專業，冒犯巴塞球迷。


朗格勒嘅做法，完全復刻咗上賽季歐聯出局時嘅夏薩特。喺皇馬四強不敵車路士之後，夏薩特竟然喺場邊同車仔嘅舊隊友開懷大笑。之後發現攝像機影緊自己，夏薩特先收斂返，露出尷尬嘅笑容，可惜佢已經因此而成了皇馬球迷嘅眼中釘。