41歲朗拿甸奴再施魔法！風騷笠死門將大演帽子戲法

近日，41歲嘅「細哨」朗拿甸奴喺巴西嘅一場慈善賽中上演帽子戲法！雖然只有41歲，但佢嘅鬍鬚已經白晒，真係要慨嘆一句歲月催人老。

呢場比賽，細哨嘅動作雖然無以前咁敏捷，但昔日嘅「波底」仲喺度。

比賽嘅第12分鐘，細哨帶波突破，然後禁區頂一個假動作，扭過防守球員，之後佢連續小碎步，最後推射遠柱入網。

第39分鐘，細哨左路帶球，先傳俾隊友，隊友再回傳俾佢輕鬆推射又入。
第44分鐘，全晚最精彩嘅入球！細哨禁區邊接波，純熟腳背控波，然後佢觀察咗門將嘅站位後，非常冷靜地選擇笠射，個波嘅弧線猶如精確計過一樣，啱啱好笠過咗門將，仲要死角入網！

雖然依家已經睇唔返細哨當年魔法一般表演「開心足球」，不過每當佢有呢啲表演賽都勾起唔少佢當年嘅風采，只可惜佢嘅高峰期實在過得太快，或者中意得巴西球星就預咗係咁。