勵志哥!24歲仲係送貨司機,6年後歐聯場上絕殺馬體會!

球場新聞 於 26/11/2021 發表 收藏文章
歐聯分組賽B組第5輪,AC米蘭作客1-0絕殺馬體會,呢場亦係AC米蘭時隔8年後再次喺歐聯場上取勝,但你勢估唔到,為紅黑軍團帶嚟一場奇跡般勝利嘅竟然係一個名不經傳嘅球員,佢叫美斯亞斯(Junior Messias),一名4年前仲踢緊意丁,而且要額外打工先夠糊口嘅球員,喺佢嘅歐聯處子球拯救咗紅黑軍團,為AC米蘭出線保住了希望。


呢個咁勵志嘅故事,要由佢24歲開始講起。

一般足球員都係由細開始陪養,少年軍,青年軍,再到一隊,然而24歲嘅美斯亞斯雖然出身於巴甲球隊高士路青年軍,但足球之路並不順利。佢之後去咗意大利生活,不過佢無放棄過足球夢,一邊做做送貨司機,一邊踢波。25歲個年,佢來到意大利為第5級別聯賽嘅卡薩萊效力,32場比賽中佢射入咗21球,幫助球隊升上意丁。

美斯亞斯喺意丁為基耶里效力咗一個球季,33場射入15球;之後又再進一步,27歲嗰年加入意丙球隊在戈薩諾,終於踏上咗職業球員之路;28歲時嘅喺克羅托內踢意乙,並協助球隊最終拿到聯賽第二升入意甲,雖然球隊踢咗一季時間就降班,但美斯亞斯踢咗36場意甲,入咗9球。努力終於得到回報,30歲嘅美斯亞斯迎來了AC米蘭伸出橄欖枝,並借用咗佢一季,美斯亞斯發夢都無諗到自己可以加盟一間百年豪門。

美斯亞斯今季意甲只係上陣過2次,呢場更加係佢首次喺歐聯披甲,結果一球成名!

賽後美斯亞斯激動地表示今次係對佢最重要嘅勝利:「入波一刻我好想喊,我為比賽結果感到開心,我終於等到報答球隊嘅機會,呢場係我今世人最重要嘅一場勝利,呢個入波我要獻俾巴西嘅屋企人同朋友,仲有嗰啲始終相信我實力嘅人。」

可能一年後佢會消失於大眾嘅視野,但呢一刻請大家記住佢個名,佢叫美斯亞斯(Junior Messias),一個努力追尋夢想嘅普通人!

留言


請按此登錄後留言。未成為會員? 立即註冊
    快捷鍵:←
    快捷鍵:→