生涯再遇0-5失利！C朗氣急敗壞對紅軍小將施展「C三腳」

曼聯同利物浦嘅「強」強對話，最後竟然變成一面倒嘅蹂躪賽事，面對呢場慘敗，心理質素強如C朗拿度也難免被情緒牽動，做出唔理智嘅行為。

講緊嘅就係上半場補時1分鐘嘅時候，C朗喺禁區內單刀面對艾利臣，可惜角度太窄射門被對方撲出，隨後利物浦嘅小將居迪斯鍾斯攞到波，鍾斯用教科書般嘅護球動作，令到C朗一籌莫展，心急想搶返控球權嘅C朗干脆直接一腳踢落鍾斯到，未算，鍾斯訓咗喺地嘅時候，C朗又發力接連再踢多瓊斯兩腳。

C朗怒踢鍾斯片段：https://www.youtube.com/watch?v=NkgYCV8Pen0球證雖然已經鳴哨，但C朗呢幾下動作真係太顯眼，於是激嬲咗利物浦球員，雲迪克仲第一時間沖過來幫阿仔出頭，指責C朗嘅踢人動作，雙方爭拗下，最終要由球證趕過嚟分開兩隊球員，並向C朗出示黃牌警告先收到科。

平心而論，筆者睇咗咁多年波，C朗呢幾下故意踢人嘅不智舉動，一定係紅牌，只係食咗張黃牌，真係有點兒那個。不過從隨後嘅比賽發展嚟睇，C朗呢次舉動雖然算逃過咗紅牌，但亦都得不償失，因為本來上半場補時係3分鐘，結果補時5分鐘，而利物浦就喺補時第5分鐘將紀錄改寫成4-0，徹底將曼聯打入深淵！

今次係C朗職業生涯第2次遭遇0-5慘敗，上一次係2010年11月踢皇馬時喺巴主場被屠殺。

賽後，C朗喺社交網發文抒發心情，稱今次嘅結果唔係球隊想要的，並強調只能怪自己做得唔夠好，唔可以怪其他任何人，但佢就無就呢次踢人事件作解釋。