巴塞鋒線頭牌？迪比面對半空門「匪夷所思」向後射？

自從美斯離開咗巴塞隆拿之後，球隊頓時陷入困境，尤其鋒線攻力真係直線下插！

而被外界視為巴塞鋒線頭牌嘅迪比，狀態依然低迷，雖然啱啱打和卡迪斯場波，佢有「多達」3次嘅射門，佔咗全隊嘅一半，但呢3次射門，質素認真麻麻，其中一次射門更加可以用「匪夷所思」嚟形容。

第51分鐘時，迪比喺小禁區接應地波傳中，可惜佢準備撞射半空門嘅時候明顯判斷錯誤，結果佢嘅後腳踭踢到個波彈到佢身後，真係令人啼笑皆非！
官方精華：https://www.youtube.com/watch?v=DqbgMui18Kc（由 0:30 開始）


最近2輪聯賽，巴塞只由阿拿奧祖入咗個頭槌，今季前5場比賽中只係入咗8球，創咗03/04賽季（5輪5球）以嚟最差紀錄，目前西甲啱啱開始就已經落後皇馬7分。如果一班中前線球員仲未能搵到入球良方，尤其係迪比，相信巴塞今季嘅境況會非常堪虞。