規例唔俾？C朗其實仲有機著返傳奇7號

五屆足球先生C.朗拿度回歸奧脫福，除咗表現，球迷最關心嘅就係究竟C.朗會唔會著返第一次加盟曼聯時嘅7號波衫，因為大家都等住去印波衫。

不過去印波衫之前，筆者提一提你英超對波衫號碼嘅其中一些定。根據英超官方第M3-5條款：

1. 如要想更改波衫號碼，球會需向英超方面提出申請
2. 留喺同一隊嘅球員，新賽季也將保留原有嘅號碼
3. 如果有球員離隊，佢之前嘅號碼就可以重新分配

即係話，如果曼聯全部保留上季嘅人馬，基本上C.朗嘅願望就好難達成，除非英超特別開例。不過事情其實有轉機。首先，丹尼爾-占士（Daniel James）啱啱離隊，轉投列斯聯，咁佢嘅21號波衫就空咗出來，卡雲尼可以轉披21號，7號俾C.朗。然而，咁就涉及第二樣嘢，烏拉圭球星肯唔肯讓出7號球衣呢？根據外媒，卡雲尼係肯讓嘅，呢個舉動仲得到曼聯名宿里奧費迪南嘅稱讚，而且佢喺國家隊嘅號碼就是21號。
其實呢個情況係有先例嘅。喺2012/13球季，熱刺嘅雲達華治被出售，佢本身嘅10球衣就轉咗俾艾迪巴約，而艾迪巴約本身嘅25號就俾咗新加盟嘅洛里斯。


咁睇嚟，C.朗好大機會可以如願以償，著返件紅魔7號。不過，曼聯仲有一樣嘢要處理，就係會唔會經濟補償返俾嗰啲已經買咗卡雲尼7號波衫嘅球迷。