被低估的射手?艾格斯驚天車身倒掛,集姿勢、力度、速度於一身!

球場新聞 於 23/08/2021 發表 收藏文章
英超開賽兩週已經非常引人入勝,又有話題又有靚波睇,好似啱啱呢週,阿士東維拉嘅射手丹尼艾格斯(Danny Ings)就表演咗一球驚天車身倒掛,可謂睇到拍案叫絕!


由於「1億鎊先生」基亞利殊被曼城買走,阿士東維拉今夏由修咸頓收購射手丹尼艾格斯頂替前者。雖然兩人身價相差一段距離,不過開季至今,艾格斯表現亦可圈可點,今季英超已經連續2場有波入,相比起基亞利殊,可以話係「蔗渣價錢踢出燒鵝味道」!

今場波阿士東維拉入嘅第二球就係由艾格斯射入,而且呢球可以話係暫時歐洲各大聯賽嘅首席金球也不為過。呢球出現喺上半場補時,當時阿士東維拉得到界外球,右閘馬迪卡殊「手榴彈」掟入禁區,泰朗明斯頭槌二傳,艾格斯睇準時機,以車身倒掛金勾轟入網,打開紀錄。

NowTV 官方精華:https://www.facebook.com/now.comSports/posts/4328201163881770

呢球波,無論姿勢、力度同速度都集於一身,猶如動畫中嘅車身倒掛標準,靚到個龍都呆咗,得個望字。

29歲艾格斯當年協助般尼升上英超打出名堂,其後被豪門利物浦收歸旗下,可惜傷多過踢,加上利物浦前線實在有人滿之患,最後被紅軍放棄。3年前,艾格斯轉投修咸頓,喺2019/20年球季英超上陣38場入咗22球,只係比英超神射手華迪入少1球,如果唔係佢嘅傷病史,相信各大豪門必定對佢虎視眈眈。

丹尼艾格斯今季開頭開得咁靚,似乎要話俾人知「你哋真係唔好低估我!」

留言


請按此登錄後留言。未成為會員? 立即註冊
    快捷鍵:←
    快捷鍵:→