默契波？定皇馬踢歐國盃？C.朗指揮賓施馬回傳，後者照做！

歐國盃死亡之組F組戰到最後一輪最後一刻，最後皆大歡喜，法國、德國同葡萄牙三大強隊齊齊出線。而法國對葡萄牙場波入波梅花間竹，最後２—２收場。

呢個比數，我知道有球迷一定會話：「係唔係默契波呀？」其實係唔係默契波就真係唔知，但陣中兩隊員互相都好有默契，呢個就係千真萬確，點解？因為兩隊都有主力曾經一齊喺皇馬合作過囉，包括有葡萄牙嘅C朗同比比，法國有賓施馬同華拉尼，所以場波踢起上嚟，特別「友誼」，就好似以下呢球咁，去到比賽嘅第９１分鐘，雙方２—２平手，如果按呢個比分完場，大家就攜手出線，於是C朗出大招，竟然指揮對手賓施馬回傳俾華拉尼，唔好進攻，而賓施馬又真係好聽C朗話，傳俾華拉尼。見到呢個咁溫馨嘅場面，我仲以為皇馬真係踢到歐國盃！
Twitter 影片：C朗指揮賓施馬回傳俾華拉尼
Youtube 相關影片

其實C朗同賓施馬老友鬼鬼，賽後大家有傾有講又交換波衫咁，真係希望呢兩隊可以喺之後再遇，打返場生死戰，咁就球迷之福啦！